NOVO PROXECTO COMUN

Despois de Compromiso por Galicia, nace outra organización política do nacionalistmo galego. A coordinadora provisional de asembleas do chamado Novo Proxecto Común (NPC) decidiu o venres convocar a súa asemblea constituínte para o próximo 14 de xullo, aberta a todas as persoas en favor da unha "nova organización do nacionalismo galego e da esquerda inclusiva".

 

 

Os promotores do proxecto informan de que así se decidiu nunha reunión da coordinadora provisional de asembleas locais e comarcais de NPC, celebrada en Teo (A Coruña) e que, segundo fontes do colectivo, inclúen de forma individual a persoas que se escindiron do BNG e a outras que se incorporaron ao proxecto, aínda que o número máis grande de xente ven de Encontro Irmandiño,formación liderada por Xosé Manuel Beiras.

 

Na reunión decidiuse convocar a Asemblea Nacional Constituínte para o 14 de xullo en Santiago de Compostela. Estará aberta "á participación, a título individual e directo, de todas aquelas persoas que estean a favor dunha nova organización do nacionalismo e da esquerda inclusiva", "participen ou non nas reunións locais ou comarcais", que se constituirán ata esa data.

 

 

Ademais, a reunión decidiu constituír dous grupos de traballo, un de carácter técnico-organizativo e outro encargado de redactar os documentos ideolóxico-políticos. Os promotores invitaron á constitución de novas asembleas durante o proceso.

 

Finalmente, fan un chamamento ás persoas que, "cunha visión diferente, dentro da pluralidade existente no nacionalismo galego actual, estean a traballar desde ópticas diferentes na construción dun novo referente político que a sociedade galega demanda", e conclúe que as "portas están abertas e a obra sen rematar".