MINIMO SEGUIMENTO DA FOLGA NO ENSINO

A folga convocada para hoxe en todo o sistema educativo tivo un baixo seguimento en Galicia, onde as cifras oficiais da administración autonómica elevaron ao 3,36 % o seguimento en infantil, primaria e secundaria, cifra que a central convocante CC OO elevou ao 30%.

O director xeral de Centros e Recursos Humanos da Consellería de Cultura, Educación e Ordenación Universitaria, José Manuel Pinal, considerou escaso o seguimento da folga nos centros educativos galegos, e fixou nun 3,3 % a porcentaxe de profesores de ensino infantil que non acudiron ao seu posto de traballo, por un 3,41 % en secundaria.

Por provincias, os paros obtiveron un seguimento do 3,37% na Coruña, do 3,55 % en Lugo, do 3,55 % en Ourense, e do 2,95% en Pontevedra, sinalou a consellería nun comunicado oficial, que considerou o baixo seguimento "como unha demostración de que a comunidade educativa está a valorar o esforzo da Xunta a favor do ensino".

  En Lugo, o responsable de Educación do sindicato Comisións Obreiras (CC OO), Ramón Vázquez, destacou o seguimento que está a ter a folga por parte dos alumnos de Secundaria, dado que a porcentaxe de participación, segundo os seus datos, oscila entre o 80 e o 90%, mentres que no caso do profesorado rolda "o 50 %".

Na Coruña, a incidencia da folga está a ser superior ao resto da Comunidade Autónoma e situouse en torno ao 25-27 %, segundo informaron a EFE fontes de CC OO, que han precisaron que o paro está a ter máis incidencia en secundaria que en educación infantil e primaria. Polo que respecta á educación superior, as mesmas fontes sindicais indicaron que o seguimento da folga na Universidade da Coruña "é total" e alcanza o 100 por cen.

En Vigo, CC OO cifrou o seguimento da xornada de folga na pinza do 15% ao 20%, a expensas de ampliar os datos sobre os centros educativos de maior tamaño, basicamente os de Secundaria e Formación Profesional.

Pola súa banda, en Ourense, a folga tivo un seguimento desigual na provincia a falta de datos oficiais. Alí, o responsable de Ensino de CC OO, Álex Portela, cifrou nun 30% o seguimento da folga por parte do profesorado.

Destacou tamén que a maior incidencia dáse nos centros de secundaria, onde, segundo indicou, secundárona o 90% do alumnado na cidade de Ourense fronte ao 50% de Infantil e Primaria.

Os sindicatos de profesores CC OO, UXT e STE, xunto con CEAPA e o Sindicato de Estudantes, convocaron concentracións para esta tarde nas principais cidades galegas. Todas serán ás 20.00 horas, excepto a de Santiago de Compostela, ás 19.30.