ALVARO CUNQUEIRO VALEDOR DO ALBARIÑO

Primeira actividade conxunta dende a rehabiliación do edificio

A exposición fotográfica “Álvaro Cunqueiro, valedor do Albariño”, realizada polo Concello, abriuse ao público no salón principal da Sociedade Cultural, entidade históricamente vinculada á celebración albariñense. Esta vai ser a primeira actividade conxunta Concello-Cultural dende que concluiron as obras de rehabilitación do histórico edificio da sociedade.
No convenio entre ambas institucións permítese utilizar o salón da Cultural para actividades sociais, culturais ou mesmo políticas abertas a todos os cambadeses, e que non teñan cabida no auditorio da Xuventude ou mesmo noutros espazos municipais.
A única edición do xantar da Festa do Albariño que se celebrou a cuberto foi a de 1958, por mor da choiva, e precisamente foron os locais da Cultural os que albergaron o acto. Tamén foi o único xantar albariñense no que participou o poeta Ramón Cabanillas.
A exposición de fotografías, dos anos 50, 60 e 70 do século XX, pretende reflictir a longa, estreita e fonda relación de Álvaro Cunqueiro coa Festa do Albariño e con Cambados.  O Concello acordou lembrar a súa figura, esencial na progresiva transformación da Festa.
A exposición está integrada por 12 paneis, o primeiro dos cales reproduce unha foto familiar na que está presente a figura do pai de Álvaro, Joaquín Cunqueiro Montenegro, natural de Cambados. Debaixo da imaxe, aparece unha breve recensión do xornalista Martín Fernández referindo as vinculacións familiares dos Cunqueiro con Cambados.