UNICEF DESTACA A CAMBADOS COMO UNHA DAS CIDADES AMIGAS DA INFANCIA

"Cidades Amigas da Infancia en Galicia", destacou Unicef, iluminarán de azul os seus monumentos "máis emblemáticos" para celebrar o 30 aniversario da Convención sobre os Dereitos do Neno ( CDN), este 20 de novembro, e "visibilizar os logros e os desafíos aos que se enfronta a infancia". Así o destacou Unicef nun comunicado, no que indica que o Concello de Ourense iluminará a Ponte Romana; o de Castrelo de Miño, os pantaláns do seu encoro; e os concellos do Porriño, Cabanas, Carnota, Moeche, e Tomiño, as fachadas das súas casas dos concellos. Outras administracións públicas, como a Xunta de Galicia e as deputacións de Pontevedra, A Coruña e Lugo, quixeron sumarse tamén a esta iniciativa e iluminarán de azul as súas fachadas principais. No caso de Vigo, o Concello tinguirá de azul as fontes da rúa Aragón. Mentres, os concellos de Boqueixón e Cambados quixeron sumarse tamén a esta iniciativa. Nalgúns casos, ademais da iluminación, proxectarase o logo do 30 Aniversario da CDN e vídeo mupi con imaxes de nenas e nenos, como é o caso da Deputación de Pontevedra, concretaron as mesmas fontes. "Desde que se aprobou a CDN hai 30 anos producíronse avances históricos para os nenos e nenas do mundo. Con todo, moitos dos nenos máis pobres aínda non notaron os seus efectos, segundo un novo informe titulado A Convención sobre os Dereitos do Neno nunha encrucillada", destacou Unicef. O documento, que forma parte da celebración do 30 aniversario da CDN, "examina os innegables logros que se produciron durante as tres últimas décadas, que demostran que a vontade e a determinación políticas teñen o poder de mellorar as vidas dos nenos", engadiu. "Ademais dos desafíos persistentes que afrontan en materia de saúde, nutrición e educación, os nenos de hoxe en día teñen que facer fronte a novas ameazas como o cambio climático, o abuso en liña e o ciberacoso. Só coa innovación, as novas tecnoloxías, a vontade política e o aumento dos recursos axudaremos a facer realidade a visión da Convención sobre os Dereitos do Neno para todos os nenos do mundo", manifestou a directora executiva de Unicef, Henrietta Fore.

ESTUDANTES DO ASOREY ABORDAN A DESIGUALDADE NO ÁMBITO CIENTÍFICO E TECNOLÓXICO NA DELEGACIÓN DO GOBERNO

O alumnado de dous centros das provincias da Coruña e Pontevedra, o IES Francisco Aguiar, de Betanzos, e Francisco Asorey, de Cambados, abordaron onte mércores, nunha visita á Delegación do Goberno en Galicia, a desigualdade no ámbito científico e tecnolóxico. Segundo informa a Delegación do Goberno, máis dun centenar de estudantes continuaron o programa de visitas á exposición 'As mozas somos guerreiras... e tamén enxeñeiras e científicas, tecnólogas, matemáticas...', que está aberta ata o próximo 29 de novembro. Guiados pola responsable da área de Igualdade da Delegación, María Debén, e a director da área da Alta Inspección de Educación, Manuel Regueiro; o alumnado compartiu o contido da mostra do Consello Superior de Investigacións Científicas (CSIC). Nela, lémbrase que as mulleres "representan apenas ao 30% do alumnado nas carreiras universitarias dos ámbitos científicos e técnicos", remarca a Delegación do Goberno, que lembra que o obxectivo foi concienciar aos estudantes "da importancia de alcanzar cotas máis altas de igualdade e o feito de que a educación pode ser unha vía para iso". Esta visita forma parte das actividades programadas pola Delegación do Goberno, en colaboración co Ministerio de Presidencia, Relacións coas Cortes e Igualdade, con motivo do Día da Eliminación da Violencia contra a Muller.

O CONCELLO DE CAMBADOS ABRE O PRAZO PARA INSCRIBIRSE NO CURSO DE LINGUA DE SIGNOS

O Concello de Cambados, a través da Concellaría de Servizos Sociais, é unha das institucións que facilitan a aprendizaxe de lingua se signos. Logo do éxito acadado no curso anterior, volve repetir a experiencia este ano. Así, o vindeiro 19 de outubro arrincará en ExpoSalnés o novo curso de lingua de signos, que se celebrará os sábados das 16.00 a 20.30 horas, e que se prolongará ata o mes de maio.

As prazas gratuítas están reservadas para as persoas empadroadas en Cambados. Aínda que as persoas non residentes no municipio cambadés poderán asistir igualmente ao curso pero aboando 20 euros ao mes. As clases terán unha duración de 1 hora e media, e o alumnado estará dividido en tres grupos: nivel inicial básico (das 16 ás 17:30 horas); nivel intermedio (das 17:30 ás 19 horas); e, grupo de non residentes (das 19 ás 20:30 horas).

Para inscribirse no curso de lingua de signos, as persoas interesadas deben dirixirse ao despacho de Consumo, situado no primeiro andar do Concello de Cambados.

O curso será impartido pola profesora Miriam Aller, da empresa Entresignos, e hai corenta prazas dispoñibles, segundo informou o concelleiro de Servizos Sociais, Tino Cordal. Ademais dos signos propiamente ditos, os asistentes terán oportunidade de coñecer aspectos da cultura das persoas xordas, que existe como tal, e as estratexias que se poden usar para favorecer a comunicación con este colectivo. O curso será de carácter eminentemente práctico.

Dia Internacional da Lingua de Signos

Segundo a Federación Mundial de Xordos, existen aproximadamente 72 millóns de persoas xordas en todo o mundo. Máis do 80 por cento vive en países en desenvolvemento e como colectivo, utilizan máis de 300 diferentes linguas de signos. As linguas de signos son idiomas naturais para todos os efectos, estruturalmente distintos das linguas faladas. Existe tamén unha linguaxe de signos internacional que é o que utilizan as persoas xordas en reunións internacionais e, de xeito informal, cando viaxan e socializan.

A convención sobre os dereitos das persoas con discapacidade recoñece e promove o uso das linguas de signos. Establece que teñen o mesmo estatus que as linguas faladas e obriga as Administracións a que faciliten a aprendizaxe da lingua de signos e promovan a identidade lingüística da comunidade das persoas xordas.

O 23 de setembro celébrase o Día Internacional das Linguas de Signos, proclamado pola ONU en novembro de 2017. A data conmemora a creación da Federación Mundial do Xordo (World Federation of the Deaf) en 1951, organización non gobernamental que neste momento ostenta o carácter de órgano consultivo das Nacións Unidas e máxima autoridade mundial para a defensa dos dereitos e intereses das persoas con disfunción auditiva.

A Asemblea Xeral das Nacións Unidas establece que o acceso cedo á lingua de signos e aos servizos nesta linguaxe, incluída unha educación de calidade nesa lingua, é vital para o crecemento e o desenvolvemento das persoas xordas e decisivo para o logro dos obxectivos de desenvolvemento sostible. Resalta tamén a importancia de preservar as linguas de signos como parte da diversidade lingüística e cultural.

21 ENTIDADES SOCIAIS RECIBIRÁN AXUDAS DA DEPUTACIÓN PARA IGUALDADE E A LOITA CONTRA A VIOLENCIA MACHISTA

A Xunta de Goberno da Deputación de Pontevedra acaba de aprobar a concesión de axudas, cun orzamento de 105.000 euros, a 21 entidades de iniciativa social sen ánimo de lucro de 10 concellos da provincia para o fomento da igualdade de oportunidades e a loita contra as violencias machistas no ano 2019. Deste xeito, benefícianse desta liña de subvencións entidades de Caldas de Reis, Cambados, Cangas, A Guarda, Mos, Pontevedra, Silleda, Vigo e Vilagarcía de Arousa.

Máis polo miúdo, con esta liña de axudas o goberno de Carmela Silva pretende apoiar as entidades sociais da provincia para que poidan desenvolver proxectos e actividades de sensibilización; formación e prevención da violencia de xénero; proxectos de atención integral para vítimas de violencia de xénero, fillas e fillos e persoas dependentes ao seu cargo; programas e actuacións destinados a mulleres en situación de especial vulnerabilidade e con singulares dificultades; proxectos e actividades que favorezan e fomenten a igualdade entre mulleres e homes; proxectos encamiñados á mellora da formación e orientación para o emprendemento e a inserción laboral das mulleres; accións dirixidas a crear redes e servizos de apoio que favorezan a conciliación da vida persoal, familiar e laboral, e campañas de difusión e sensibilización da cidadanía en materia de igualdade.

A deste ano é a cuarta convocatoria de subvencións dirixidas a entidades de iniciativa social sen ánimo de lucro da provincia que están a desenvolver proxectos, programas e actividades para a igualdade entre mulleres e homes e a loita contra as violencias machistas.

QUERE SER VOLUNTARIO/A NO PUNTO MORADO DURANTE O ALBARIÑO?

Igualde Cambados invítanos a participar como voluntarios no Punto Morado durante a Festa do Albariño. Así o acaban de facer público a través da súa páxina en Facebook© .

"Queres participar no voluntariado do punto morado nesta próxima festa do albariño?
Se eres home ou muller, dispós ainda que sexa dunhas horas durante a duración da festa , a túa axuda é necesaria! 
Tan só tes que asistir a unha formación do protocolo de prevención de agresións que ten unha duración de 4 h nunha soa sesión.
Faremos a primeira formación o venres 26 xullo de 9:30 h a 13:30h  e se non podes venres o próximo luns 29 xullo a segunda formación en horario de tarde 17h -21h
As inscricións:
Envia un mail a:   igualdade@cambados.es
telf/whatsapp  682660580"

ACTIVIDADES PARA XÓVENES E ASOCIACIÓNS DE MULLERES

Onte os tres centros de ensinanza secundaria, bacharelato e FP de Cambados recibiron a Campaña NON ME TOQUES O WHATSAPP!!

Os 1.200 xovenes escolarizados nos institutos de Cambados participaron nesta campaña deseñada pola Concellería de Igualdade.

Programa de sensibilización do ministerio do interior dentro do pacto de estado contra a violencia de xénero e a Xunta de Galicia.

Onte tamen rematou a formación PARA QUE QUERES A MEDIA LARANXA? , SE TI XA ERES UNHA LARANXA ENTEIRA !
Dirixida a asociacións de mulleres do concello de Cambados e organizada pola Concellería de Igualdade do Concello de Cambados

Programa de sensibilización do ministerio do interior dentro do pacto de estado contra a violencia de xénero e a Xunta de Galicia.

MAIO E XUÑO MESES DA IGUALDADE EN CAMBADOS

Programa Cambados en Igualdade, en maio e xuño de 2019:

– 13 de maio: Mesa xuvenil contra a violencia de xénero. Ás 18:00 no salón de plenos

– 15 e 22 de maio: campaña contra a violencia de xénero: ¿onde está a niña media laranxa?

-Material de sensibilización contra a violencia de xénero nos centros de ensinanza secundaria

– Formación en materia de empoderamento feminino e autoestima a asociacións de mulleres de Cambados

– 21 de maio: Difusión da campaña “non me toques o whatsapp!” Prevención da violencia de xénero a través das TICs

– 24 de maio: Taller de xogos e xoguetes en igualdade. De 17 a 19 h no salón de actos de Exposalnés

– 28 e 29 de maio: Obradoiro de empoderamento feminino. De 17 a 21 h no salón de actos de Exposalnés

– 31  de maio: Comunicación e publicidade efectiva nas vendas (RRSS e marketing dixital). De 16 a 21 h no salón de actos de Exposalnés

– 3 e 4 de xuño: Como mellorar as túas vendas. Comunicación non verbal, peche de vendas, TICs

– 13 de xuño: Mesa de igualdade no mundo do viño. De 18 a 20:30 h no salón de actos de Exposalnés

– 18 de xuño: Programa de sensibilización dirixido a educación primaria a través das redes sociais “eu de maior quero ser…”

– Actividades de educación en maio e xuño: formación en centros de educación secundaria “Formación en diversidade”

Inscricións e información en: igualdade@cambados.es ou no teléfono 682660580

 

MAÑÁN ANDAINA DO COLECTIVO FEMINISTA "A NAICIÑA"

Mañán venres 8 de Marzo a partires dás 19:00 e desde a Escalinata de Santomé, celebrarase a primeira Andaina do Colectivo A Naiciña na que colabora o Concello de Cambados con motivo do Día Internacional da Muller.
Esta é tamén a primeira andaina reivindicativa que se celebra polo centro de Cambados.

As mulleres e homes que fagan a andaina estarán compañadas de música de batuka. E o chegar a escultura da Naiciña os nenos de Xironsa recibiránnos ao son do himno galego.

Previamente, 6 da tarde ensaiarán no Salón Peña as letras que acompañarán ás mulleres cambadesas, e ao que pode asistir quen o desexe.

ACTOS DA SEMANA DA MULLER EN CAMBADOS

A semana da muller conmemórase en Cambados coas seguintes actividades:

– III Fast dates entre mulleres. O 7 de marzo, ás 18:00 en Exposalnés. Trátase dunha iniciativa para o fomento do emprendemento e a búsqueda activa de traballo, consistente en reunións rápidas entre mulleres emprendedoras ou en busca de traballo (inscricións en axente.igualdade@osalnes.com ou no 622098721).

– Almorzo de emprendedoras. O 8 de marzo ás 10:00 en Exposalnés (inscricións en axente.igualdade@osalnes.com ou no 622098721, entrada de balde).

– Lectura do manifesto 8M: ás 12:00 na praza do Concello.

– Proxección do filme Vaiana: o 8 de marzo ás 17:00 no auditorio da Xuventude, entrada libre.

8 de Marzo ás 19:00 desde a Escalinata de Santomé, Andaina do Colectivo A Naiciña. Colabora o Concello de Cambados

– Gala da muller, o domingo 10, ás 18:00 no auditorio da Xuventude. Entrada libre.

MANIFESTO DO COLECTIVO FEMINISTA "A NAICIÑA"

Neste mes de febreiro un grupo de mulleres puxeron en común o seu interese en crear un Colectivo Feminista. Esta é unha necesidade cívica de persoas que sinten o impulso positivo de xuntarse, compartir experiencias dialogar e aprender. E levar o que naza desta sinerxia a todos os ámbitos posibles, xerar unha rede de confianza na que todas as persoas que queiran poidan participar con elas deste movemento, o feminista, cunha historia detrás pero máis que nada, con moito futuro.
Entenden, estas mulleres, que o feminismo é unha realidade imposible de abranguer. Elas mesmas son conscientes de que cada unha individualmente é diferente ás demáis, por iso mesmo para sumar todo o que poidan, decidiron a partir desde o máis  de explicar, "o feminismo é liberador, para tod@s. Trátase de buscar igualdade de dereitos, de educar nesa igualdade, de aliarse entre as mulleres e tamén cos homes. O importante non é de onde vimos ou o xénero o importante é chegar co afecto a reinvindicar un feminismo en positivo.
Este foi o mínimo no que se puxeron de acordo.

Por iso invitan á súa segunda xuntanza e primeira asemblea aberta en Exposalnés o vindeiro dia 1 de marzo ás seis da tarde.

O CONCELLO DE CAMBADOS CONVIDA A SUMARSE Á CAMPAÑA 25N DÍA CONTRA A VIOLENCIA DE XÉNERO

O Concello de Cambados quere contribuír a erradicar a violencia de xénero,  unha lacra social que ademais de constituír unha grave violación dos Dereitos Humanos, afectános a tod@s.

Unha sociedade non pode considerarse democrática tolerando o maltrato e o asesinato das mulleres, e por iso queremos visibilizar este problema loitando contra a violencia de xénero e a favor da igualdade e da non discriminación, non só o domingo 25 de novembro senón todos os días do ano.

Por este motivo o Concello convida a todos a sumarse a esta campaña. Á cidadanía, institucións e establecementos comerciais -pois queren implicar a todo o pobo nesta loita- colocando un cartel en sinal de repulsa da violencia machista que se poderá  recoller na alcaldía do concello desde hoxe mesmo (1 por establecemento) ata esgotar existencias.

Reivindicar a igualdade e a non violencia contra as mulleres é preciso para sensibilizar á sociedade.

Por un mundo máis xusto. Por ti, por tod@s.

CAFÉ COLOQUIO: MULLERES DIVERSAS!

O venres 23 de novembro, dentro da programación que este concello pon en marcha con motivo do 25 de novembro (día internacional contra a violencia de  xénero), terá lugar en Exposalnés o café coloquio “mulleres diversas!” que organiza a concellaría de igualdade.

Será ás 19:00, con entrada de balde.

Spot 25 NON á violencia de xénero

ACTIVIDADES DE IGUALDADE EN NOVEMBRO E DECEMBRO

• Lectura do manifesto mancomunado contra a violencia de xénero

23 Nov – Cambados, Meis, Ribadumia e Vilanova de Arousa

12h – Edificios dos Concellos 

Actividades Cambados:

Novembro:

• Formación nos centros educativos de Cambados

Educación primaria:

Abre os ollos á igualdade de xénero no fogar 

Educación secundaria e FP:

Curtametraxes e monólogos contra a violencia de xénero

• Charla informativa sobre a devolución do IRPF de Maternidade e Paternidade

13 Nov – 19h – Edificio Exposalnés

• Charla formativa dirixida a pais e nais de adolescentes:

Prevención da sextorsión e ciberviolencia de xénero na adolescencia

22 Nov – 19h – Edificio Exposalnés

• Lectura do manifesto mancomunado contra a violencia de xénero

23 Nov – 12h – Casa do Concello

• Café coloquio: Mulleres diversas

23 Nov – 19h – Edificio Exposalnés

Decembro:

• Formación nos centros educativos

Educación primaria:

Abre os ollos á igualdade de xénero no fogar

 Educación secundaria e FP:

Curtametraxes e monólogos contra a violencia de xénero

• Xornada sobre resolución de conflictos na familia e na parella

4 Dec – 19h – Edificio Exposalnés

 Curso de técnicas para falar en público

20 Dec – 19h – Edificio Exposalnés

A MANCOMUNIDADE ESTUDA CREAR UN PUNTO DE ENCONTRO DE INTERCAMBIO FAMILIAR E ACTIVIDADES DO CIM DO SALNÉS CARA O 25N

A Mancomunidade do Salnés levará ó seu vindeiro pleno a proposta da Asociación ESMAR a creación dun punto de encontro familiar na comarca. 

A petición vai ser tratada no vindeiro pleno da Mancomunidade. ESMAR, leva tempo percorrendo as distintas localidades da comarca na procura de apoios para instar á Xunta a creación deste servizo. A Mancomunidade apoia esta petición e si o goberno galego descarta crear ese punto, será esta entidade a que cree un punto de intercambio familiar. Actualmente, o “Punto de Encontro” máis próximo para as familias do Salnés está en Pontevedra i encóntrase saturado. Segundo Gonzalo Durán, trátase de prestar un servizo que evite prexuízos ós menores.

O asunto será estudado polos especialistas da Mancomunidade e a pesares de ser algo complexo, agardan atopar a solución, tal como demostra o historial de traballo do ente comarcal noutros retos, como por exemplo a creación do CIM do Salnés.

Pola súa banda o CIM do Salnés ten preparado un amplo programa en conmemoración do Día Internacional contra a violencia de xénero 25N.

Serán numerosas actividades en materia de igualdade e contra a violencia de xénero que se desenvolverán ao longo de novembro e decembro.
Iniciativas como formación nos centros educativos de Cambados, Meis, Ribadumia e Vilanova de Arousa, coa proxección de curtametraxes nos Institutos de Secundaria e FP, cursos de Defensa Persoal, charlas informativas sobre a devolucion do IRPF de Maternidade e Paternidade ou sobre a Prevención da sextorsión e ciberviolencia de xénero na adolescecia.

Tamén se inclue a Lectura do Manifesto o propio 25 N, o Simposio itinerante Móstrate Salnés, este ano en Vilanova, e un Curso de Redes Sociais para mulleres emprendedoras.

Así o explicaba esta mañá a ténica do CIM, Mónica Novas, na presentación das actividades, acompañada do presidente e o xerente da Mancomunidade do Salnés, Gonzalo Durán e Ramón Guinarte, respectivamente, así como da concelleira de Ribadumia, Mar Muimenta.


Máis info: Arousa Sí Radio Salnés

A DEPUTACIÓN COMPROMÉTESE A VISIBILIZAR AS MULLERES CON DIVERSIDADE FUNCIONAL NOS ACTOS DE IGUALDADE

A Presidenta denunciou no III Encontro Provincial pola Inclusión a necesidade de garantir o seu acceso ao mercado laboral e a accesibilidade universal

A Presidenta da Deputación de Pontevedra, Carmela Silva, comprometeuse durante a xornada técnica do III Encontro Provincial pola Inclusión a que "en cada acto que organice a Deputación para defender os dereitos das mulleres, as mulleres con diversidade funcional van participar". Silva asegurou que esta decisión débese a que "as mulleres con diversidade funcional teñen as mesmas desigualdades que todas nós, pero ademais sofren unha segunda desigualdade". A Presidenta tamén informou dun dato "que nos ten que alarmar para tomar medidas: o 23% das mulleres con diversidade funcional sufriu ou sofre violencia física, sexual ou medo, fronte ao 15% das mulleres sen diversidade funcional". Por todos estes motivos, "ímolas facer visibles, na Deputación vaise acabar esta situación". A Presidenta anunciou que "na acción máis inmediata que organicemos a primeira invitada será Ánxela López Leiceaga", presidenta da asociación VIGalicia que promove a vida independente das persoas con diversidade funcional e que estivo presente na xornada do Encontro. "Agradezo a túa valentía e a túa garra, precisamos moitas mulleres coma ti".

A Presidenta provincial fixo unha segunda reclamación para "que todas as administracións aposten pola accesibilidade universal como o fai a Deputación de Pontevedra. Queremos un territorio onde todas as persoas teñan cabida e tomamos moitas medidas para iso". Carmela Silva referiuse ao "Plan Móvese e a todas as nosas propostas de infraestruturas e recuperación dos espazos públicos" e avogou por que "a accesibilidade universal sexa un obxectivo prioritario non para mañá, para hoxe".

A Presidenta tamén se referiu ao emprego. Silva lembrou que "na provincia de Pontevedra hai preto de 85.000 persoas con algún tipo de diversidade funcional recoñecida", sendo "a provincia galega cunha maior porcentaxe de persoas con diversidade funcional, cun 9% fronte ao 8,3% de Ourense, o 8,2% da Coruña e o 6,3% de Lugo". Desas persoas, algo máis do 35% son activas para o mercado laboral, pero "a taxa de emprego sitúase no 25% no Estado e no 21% en Galicia", denunciou. Ademais, no que se refire á diversidade funcional intelectual, os datos amosan que das 92.000 mulleres que padecen algún tipo "20.000 están preparadas para traballar e só 6.000 están ocupadas, é dicir, só o 6% delas". Ademais, "este dato fala moi particularmente da desigualdade, porque no caso dos homes esta mesma cifra se sitúa arredor do 12%".

Ante todos estes feitos, a Presidenta concluíu que "precisamos tomar medidas inmediatas que garantan a igualdade de oportunidades e a inclusión laboral das persoas –pero particularmente das mulleres– con diversidade funcional, e tamén que a accesibilidade universal deixe de ser unha palabra bonita recollida nos documentos para ser unha realidade. Precisamos garantir tamén a formación e a atención, sexa sanitaria, social ou de calquera tipo, porque de non ser así unha porcentaxe moi importante das persoas estará fóra das redes de atención". A este respecto, Carmela Silva denunciou que "os coidados seguen a recaer nas mulleres, pero gustaríame que o 50% da poboación estea en todos os ámbitos, sexa cal sexa, o que signifique que tamén os homes se dediquen a coidar das persoas con diversidade funcional".

A xornada técnica é a primeira das dúas que compoñen o III Encontro Provincial pola Inclusión. Tivo lugar no Museo de Pontevedra e nela "falamos de emprendemento, da situación laboral das persoas con diversidade funcional e particularmente da situación das mulleres", asegurou a Presidenta provincial. "Trátase de escoitar á sociedade para que poidamos incluír as súas demandas nas nosas políticas, dentro das nosas capacitades e competencias. Un exemplo diso é a denuncia da invisibilidade das mulleres con diversidade funcional, que agradezo e collo como propia", asegurou Carmela Silva. 

Nesta xornada técnica as persoas asistentes desfrutaron de intervencións dinámicas, exposicións e actuacións nas que se abordaron distintas cuestións relacionadas coas persoas con diversidade funcional, xerando un espazo onde expoñer boas prácticas dun xeito creativo. Mañá, o pavillón do Centro Príncipe Felipe acollerá a xornada de convivencia, unha xornada lúdica á que asistirán persoas relacionadas con organizacións e entidades que desenvolven o seu labor no ámbito da inclusión e da igualdade, familias e público xeral.

O SERVIZO DE IGUALDADE DA DEPUTACIÓN DE PONTEVEDRA CONVOCA UNHA CONCENTRACIÓN ESTE MÉRCORES CONTRA OS ATAQUES MACHISTAS

O acto de protesta terá lugar na cidade de Pontevedra as 20.00 h no encontro das rúas Daniel de Sota coa Peregrina.

O Servizo de Igualdade da Deputación de Pontevedra convocou para este próximo mércores unha concentración de condena de todo tipo de comportamentos e ataques machistas ás mulleres, e especialmente do machismo institucional dos cargos públicos

Baixo o lema de "Machismo institucional. Nin un minuto máis", a concentración xurde en repulsa aos últimos insultos machistas do alcalde de Vilanova de Arousa, Gonzalo Durán, e para reclamar o cesamento inmediato de calquera comportamento relacionado coas violencias machistas e coas distintas formas de discriminación e violencia que sufrimos as mulleres. A protesta terá lugar este mércores as 20.00 h no encontro da rúa Daniel de la Sota coa rúa Peregrina, na cidade de Pontevedra.

Esta concentración, á que se convoca a toda a cidadanía, enmárcase nas habituais convocatorias da Área de Igualdade da institución provincial, desde a chegada deste goberno á Deputación de Pontevedra, como protesta e en resposta a cada comportamento machista e de ataque ás mulleres polo feito de selo.

A DEPUTACIÓN DE PONTEVEDRA DENUNCIARÁ AO ALCALDE DE VILANOVA POR INCITACIÓN AO ODIO

Os servizos xurídicos da Deputación de Pontevedra presentarán nos tribunais de Xustiza unha denuncia "fronte aos ataques machistas, ás inxurias e ás calumnias", pero tamén "fronte á posible incitación ao odio" que, a xuízo do goberno provincial, supoñen as declaracións do alcalde de Vilanova de Arousa, Gonzalo Durán nas que dixo que a presidenta da administración provincial, Carmela Silva, era a " chacha para todo" do "ancián" alcalde de Vigo, Abel Caballero. Este luns compareceu en rolda de prensa o portavoz do goberno da Deputación de Pontevedra (PSOE+BNG) Carlos López Font que anunciou que os servizos xurídicos da Deputación de Pontevedra traballan xa na redacción dunha denuncia contra este alcalde do Partido Popular. Ademais de condenar as manifestacións do rexedor vilanovés e solicitar a súa dimisión, López Font instou aos cargos da Xunta de Galicia e do Partido Popular a pronunciarse e condenar este tipo de actitudes "de tal gravidade que non se trata dunha defensa da persoa", neste caso da presidenta da Deputación, senón de "saír con valentía" ante un "ataque á dignidade de todas as mulleres".

O portavoz do goberno provincial tamén anunciou que a presidenta da Deputación "non se vai a volver referir a este señor". López Font asegurou que, como goberno da Deputación, "no que temos a bandeira da igualdade desde o minuto uno", teñen o "deber político" de poñerse de fronte a todos aqueles que utilicen "comportamentos e unha linguaxe machista contra as mulleres", cualificando de "linguaxe bélica" o que utilizou o Gonzalo Durán. "Non imos consentir estes ataques machistas, clasistas e fascistas; e moito menos en voz daqueles que ostentan cargos públicos e que estes ataques poidan quedar impunes", destacou o portavoz do goberno provincial. Este deputado lembrou que no caso concreto do alcalde de Vilanova de Arousa "reitérase neste tipo de comportamentos" con "insultos á presidenta da Deputación de Pontevedra única e exclusivamente polo feito de ser muller". Neste sentido, lembrou que esas declaracións realizáronse o venres "e reafirmáronse o domingo" polo que López Font dixo que "non podemos entender" como o presidente da Xunta de Galicia, Núñez Feijóo, e o vicepresidente, Alfonso Rueda, "aínda non saíron a condenar este comportamento do seu alcalde en Vilanova".

Igualmente referiuse ao "silencio" de Susana López Abella, secretaria de Igualdade da Xunta de Galicia, engadindo que "se non sae de forma inmediata a expresar o seu total e contundente rexeitamento a estas manifestacións machistas do señor Durán, quedará inhabilitada para exercer a función que lle corresponde que é a de representar ás mulleres na administración autonómica". Carlos López Font entende que se empeza insultando á muller, sendo peyorativo con ela e continúase coa violencia de xénero e matándoa. A secuela da violencia machista, segundo o deputado provincial, ten orixe neste tipo de descualificacións. "O que non se manifesta en contra é cómplice", apuntou. Ademais, indicou que non é a primeira vez que se realizan declaracións como esta contra a presidenta da Deputación Provincial por ser muller e lembrou a dimisión de Jorge Caldas, concelleira do PP de Moraña, que cualificara a Carmela Silva de "mala zorra" e "sinvergüenza".

SETE CONCELLOS DO SALNÉS ACOLLEN ACCIÓNS FORMATIVAS DO PROGRAMA DA DEPUTACIÓN, CONECTADAS

32 concellos da provincia acollen esta semana novas accións formativas do programa "Conectadas 2018"

Preto de 1.000 mulleres e homes participan dende esta semana no programa da Deputación dirixido á promoción da igualdade

Ao longo desta semana preto de 1.000 mulleres e homes de 32 concellos da provincia comezan os cursos do programa "Conectadas 2018", unha das iniciativas da Deputación de Pontevedra encamiñadas á promoción e desenvolvemento da igualdade.

No Salnés, en Vilagarcía serán 24 persoas da Asociación de Mulleres Rurais de Fontecarmoa as que participen nun obradoiro de Pilates, que será os luns e os mércores, de 19:00 a 20:00 horas. Tamén en Vilagarcía haberá outras dúas actividades: unha será na Asociación Veciñal Agustín Romero de Cornazo, onde 15 persoas farán pintura, todos os xoves de 17:00 a 20:00 horas; e outro obradoiro de Alfabetización Dixital II será na Asociación Cultural Xeada, os martes de 16:30 a 19:30, onde asistirán 17 persoas. En Vilanova vanse desenvolver cinco accións formativas. 17 persoas da Asociación de Mulleres Rurais Aceñas de Baión farán Ioga todos os luns e xoves de 20:00 a 21:30 horas. Na Asocaciación de Mulleres Rurais O Campanario haberá Iniciación ao Scrapbooking, todos os luns de 19:00 a 22:00 horas, para o que están anotadas 15 persoas. Outras 15 persoas da Asociación de Mulleres Rurais O Mouriño traballarán na Conservación de Alimentos e Conservas Artesanais, todos os luns de 19:00 a 22:30 horas. Relaxación e Manexo do Estrés será a actividade que vai desenvolver a Asociación de Mulleres Rurais e Amas de Casa Citania de Baión, os venres de 19:30 a 22:30 horas, no que están inscritas 17 persoas. O mesmo número de inscricións ten o obradoiro de Cociña, Alimentación e Hábitos Saudables da Asociación de Mulleres Rurais Lolita Trigo, que será os xoves de 19:30 a 22:30 horas.

En Cambados, a Asociación de Mulleres Rurais de Castrelo As Saíñas organiza un taller de Conservación de Alimentos e Conservas Artesanais, que será os martes de 19:30 a 22:00 horas, con 15 inscricións ata o momento. 23 persoas da Asociación de Amas de Casa Albariño traballarán na Alfabetización Dixital II todos os mércores de 17:30 a 19:30 horas. Tamén en Cambados, a Asociación Veciñal San Vicente organiza Cociña e Alimentación e Hábitos Saudables para os mércores, de 20:00 a 22:30 horas, para o que hai 20 persoas inscritas. No concello da Illa, a Asociación de Mulleres Rurais San Vicente ten un taller de Teatro para os martes e xoves, de 17:00 a 19:00 horas, con 15 persoas anotadas. En Meis, 15 persoas da Asociación de Mulleres Rurais O Marco de San Salvador falarán de Cociña e Alimentación e Hábitos Saudables os martes e mércores de 20:30 a 22:30 horas.

A EXPOSICIÓN “SORRISOS TRANSFORMADORES” CHEGA AO SALÓN DE PLENOS DO CONCELLO DE CAMBADOS

O salón de plenos do Concello de Cambados acollerá entre o 17 e o 28 de setembro a exposición “Sorrisos transformadores”, que poderá ser visitada entre as 9:00 e as 14:00 horas. O mércores 19, ás 11:00 farase un acto de inauguración no auditorio da Xuventude, coa presencia da presidenta de Deputación, Carmela Silva, e da alcaldesa de Cambados, Fátima Abal.

“Sorrisos transformadores” é unha iniciativa da Deputación de Pontevedra, en colaboración coa Asociación de Familias de Menores Trans de Galicia (ARELAS), con fotografías de Noemí Chantada.

Baixo o lema “Respecta-defende-sensibiliza-iguala-vive-e deixa vivir” o proxecto busca a visibilización, sensibilización e naturalización do colectivo trans para promover a igualdade de oportunidades, o respecto á diversidade e o dereito a ser diferentes.

Esta iniciativa trata de prever actitudes e comportamentos discriminatorios por orientación sexual ou identidade de xénero e combater o acoso escolar por estes dous motivos, favorecendo a visibilidade do alumnado LGTBI e a plena normalidade das orientacións sexuais e as identidades de xénero.

O proxecto “Sorrisos transformadores” comprende unha exposición fotográfica de visibilización positiva que inclúe imaxes de persoas alegres, orgullosas, que amosan unha parcela da súa vida que lles gusta, acompañadas dun texto que reflicte unha frase ou idea. De forma paralela desenvólvense diversas charlas informativas destinadas principalmente á comunidade escolar.

PRESENTACIÓN DA EXPOSICIÓN “ 100 ANOS DE FEMINISMO PACIFISTA”

• Fátima Abal fixo fincapé en que gracias a Cambadesas como Mari Carmen Durán, as mulleres cada vez son mais visibles no mundo
• A exposición inaugurarase no Salón de plenos do Concello este vindeiro luns día 7 de maio, e estará para o desfrute dos veciños e veciñas e todos aqueles que queiran coñecer a historia da loita das mulleres pola Paz e a igualdade  a través de esta asociación WILPF durante os próximos 15 días.

No día de hoxe Fátima Abal, acompañada por Ana Pérez (responsable de igualdade no concello) e Mari Carmen Durán unha das fundadoras de WILPF ESPAÑA, presentaron aos medios o que vai ser unha exposición formada por 20 despregables onde se pode ver a loita realizada por grandes mulleres desde hai máis de 100 anos comezando esta loita no mes de abril de 1915 cando varias mulleres de renome da época presentáronse na Haya para reivindicar os seus dereitos e que se contase con elas para a toma de decisións importantes.

Esta asociación mantén unha loita dialéctica e sempre con respecto cun único obxectivo que non é outro que a Paz Mundial e que as mulleres formen parte do logro desta Paz mundial, e para iso solicitan o desarmamento de todos os países e que as mulleres teñan máis presenza nas decisións bélicas.

Fátima Abal tivo unhas palabras ao final do acto en agradecemento a Mari Carmen Durán por contar co concello de Cambados para que este sexa o pioneiro na provincia de Pontevedra en expoñer estes despregables, nos cales se poden observar os logros conseguidos desde entón por estas mulleres de gran coraxe e valor, e anima a que todos pasen a partir deste luns e gócena, estando segura de que moitos destes visitantes recoñecerán entre estas mulleres ás súas propias nais, irmás, tías, avoas ou simplemente as súas veciñas que tamén son heroínas xa que no día de hoxe seguen traballando sen descanso por acordar e pacificar dentro e fóra do ámbito familiar e sobre todo loitando pola igualdade dos seus dereitos.

galiciasurpontevedra.es