A ILLA E O GROVE CONTINÚAN EMPEORANDO DÍA A DÍA

Coronavirus Pontevedra: 83 contaxios novos e soben a 867 os casos activos

Alto número de contaxios na área sanitaria de Pontevedra-Salnés, e sobe notablemente a incidencia en Bueu, Illa de Arousa e O Grove. Cambados mantense igual que onte con 38 casos e 230 contactos en seguimento. Moi malas noticias para a área sanitaria de Pontevedra e O Salnés, que rexistra un alto número de contaxios, o maior desde o 21 de novembro, centrados sobre todos nalgunhas localidades que están a aumentar moito a súa incidencia nos últimos días. Nas últimas 24 horas producíronse 83 contaxios novos, 1 falecemento e 63 altas, o que fai que suban en 19 os casos activos, pasando de 848 a 867. A área sanitaria pontevedresa continúa empeorando en incidencia, e os municipios que máis están a aumentar son os costeiros de Bueu (366 de incidencia), O Grove (526) e A Illa de Arousa (771). Só o segundo, O Grove, está dentro dun confinamento perimetral nestes momentos. O número de pacientes hospitalizados sobe de 50 a 52 persoas, distribuídos en 41 pacientes no CHU de Pontevedra (33 en planta e 8 na UCI), 9 no Hospital Público do Salnés e 2 no Quirónsalud de Pontevedra. A área sanitaria de Pontevedra-O Salnés inclúe as comarcas de Pontevedra, O Salnés, Caldas (excepto Valga e Pontecesures), Tabeirós-Terra de Montes (salvo a Estrada) e os municipios de Marín e Bueu pertencentes ao Morrazo. Desde o inicio da pandemia tivo 6.175 casos de coronavirus, con 71 falecementos, 5.237 altas e 867 casos activos nestes momentos.