REBROTE DE FALECIDOS EN GALICIA POR CORONAVIRUS

O Sergas acaba de informar do falecemento doutras tres persoas a causa do coronavirus nos hospitais galegos. Con eles o número de falecementos en hospitais sobe a 8 durante esta xornada: trátase dun home de 55 anos e unha muller de 87 ingresados no Chuac; unha muller de 100 anos e dous homes de 82 e 75 no CHUO; un home de 70 no Hospital Vithas Fátima de Vigo; un home de 85 anos no Hospital HM Rosaleda, en Santiago e outro home de 82 anos do Hula.
A estas defuncións hai que sumar as 5 producidas en residencias de maiores con COVID-19 en Galicia, segundo os datos trasladados este luns pola Consellería de Sanidade. Os últimos falecidos en residencias (notificados este luns, pero correspondentes á xornada do domingo) son 2 usuarios do centro DomusVi de San Lázaro (Santiago), un da nosa Señora da Esperanza (Ourense), outro de DomusVi de Cangas (Pontevedra) e outro da residencia de Moledo (Vigo).
Con isto elévase a 463 (360 en hospitais e 103 en residencias) o número de vítimas por Covid-19 en Galicia.

Con esta última actualización, o número de falecidos en hospitais por áreas sanitarias é o seguinte: 107 na área sanitaria da Coruña, 71 na área de Vigo, 70 na área sanitaria de Ourense, 53 mortes na área sanitaria de Santiago, 22 na área de Ferrol, 23 na área de Lugo e 14 na área sanitaria de Pontevedra.