VARIOS FERIDOS EN ACCIDENTES NO SALNÉS

Dúas persoas feridas, unha delas excarcerada, despois de envorcar o coche no que circulaban en Sanxenxo

Dúas persoas resultaron feridas a pasada noite en Sanxenxo ao envorcar o turismo no que viaxaban. Segundo se lle indicou ao 112 Galicia, unha das vítimas tivo que ser excarcerada polos efectivos do GES de Sanxenxo, ao quedar atrapada no interior do vehículo accidentado, para que fose atendida polos profesionais sanitarios.

O sinistro produciuse no lugar de Seixomil, na parroquia de Nantes, ao fio das 22:00 horas.

Nese momento, Urxencias Sanitarias de Galicia-061 alertaba do accidente ao 112 Galicia e, decontado, os xestores do CIAE 112 Galicia pasaron o aviso á Garda Civil de Tráfico, aos Bombeiros de Ribadumia, á Policía Local e ao GES de Sanxenxo.

Unha colisión múltiple sáldase con dúas persoas feridas en Vilagarcía de Arousa

Dúas persoas resultaron feridas esta mañá nunha colisión na que se viron implicados tres turismos en Vilagarcía de Arousa. Segundo se lle indicou ao 112 Galicia, as dúas persoas foron trasladadas ao Hospital do Salnés.

O accidente tivo lugar no punto quilométrico 237 da N-640, ao fío das 10:00 horas.

Foi unha persoa particular quen contactou co 112 Galicia para dar conta do accidente. Nada máis ter coñecemento, desde o CIAE 112 Galicia pasouse o aviso á Garda Civil de Tráfico, á Policía Local, a Urxencias Sanitarias de Galicia-061, ao Servizo Municipal de Protección Civil e aos Bombeiros do Salnés.