ÉXITO DO WORKSHOP DE PONTEVEDRA EN BARCELONA

De “rotundo éxito” cualifica a Deputación de Pontevedra o primeiro workshop do destino Rías Baixas en Barcelona, celebrado este martes, e no que se deron cita 120 empresas, medios de comunicación e operadores turísticos cataláns que se reuniron con 30 empresas pontevedresas. Delas, a metade procedían do Salnés (a comarca maioritaria), entre elas o Gran Talaso Hotel Sanxenxo, Hotel Carlos I, Hotel O Son do mar, Hotel Pirámide, Galicia Vilas, Interrías, Tee Travel, Adegas Mar de Frades, Paco & Lola, Lagar de Besada ou a Ruta do Viño Rías Baixas.

Tras o workshop, celebrouse un cóctel de presentación do destino Rías Baixas no que, ademais do presidente do Clúster de Turismo de Galicia e do presidente de Feprohos, tamén se deron cita autoridades locais de Barcelona e o presidente do Centro Galego na cidade condal. Durante a presentación proxectouse o vídeo de “Somos historias” e déronse a coñecer os principais atractivos turísticos da provincia no concernente ao patrimonio, eixo de promoción da Deputación durante este ano.

Previamente, a presidenta da Deputación, Carmela Silva, acudiu a L´ Hospitalet de Llobregat onde foi recibida pola alcaldesa, Nuria Marín. Durante a recepción oficial ambas as dirixentes “intercambiaron opinións sobre as políticas públicas en materia de igualdade no ámbito local, unha área na que vén traballando fortemente o Goberno provincial nos últimos tempos e na que L´ Hospitalet é un municipio pioneiro”, destacan desde a Deputación. Así mesmo, Silva mantivo un encontro de traballo coa dirección do Fórum Gastronómico e, segundo informa o ente provincial, durante a reunión “abordáronse novas vías de colaboración que van permitir situar como referente de vangarda e calidade ao destino Rías Baixas”.