UN EX DO XUVEN NA NBA

Jeff Coby, formado en Columbia Lions e ex xogador da liga LEB Oro e LEB Prata de España, selaría un acordo para realizar a pretemporada con New York Knicks, informa o medio Sportando. O interior de 24 anos quedou fóra dos postos de acceso ao Draft 2017, polo que tivo que emigrar a España para labrarse un oco no baloncesto profesional. Desde outubro ata xaneiro xogou nas filas do Club Basquet Prat, e desde o 31 de xaneiro ata final de campaña no Xuventude Cambados.

O Xuven Cambados, vinculou os seus pasos coa ilusión dun pobo que vía aos seus máis ou menos dentro do profesionalismo do mundo da canastra. Todo iso terminaba en abril, cando o Xuven descendía de LEB Prata, terceira división nacional, a EBA. O equipo, danado economicamente, non rexistrou posteriormente e a tempo a súa praza en EBA e sairá agora a competir en Primeira Nacional Autonómica, a quinta división do baloncesto español.
O fin do curso para Cambados tamén supuxo o final de algo para Jeff Coby (Florida, 4 de febreiro de 1994). Tratouse do peche á súa primeira campaña como profesional para o á-pivote de 2,03 metros, fillo de haitianos, pero nado en Estados Unidos. Alí, na Universidade de Columbia, completara o ciclo de catro cursos, cos seus catro correspondentes campañas na NCAA. Os seus números, 5,4 puntos e 3,8 rebotes en 109 partidos.

O CB Prat da LEB Oro, segunda división do baloncesto español, dáballe un sitio en agosto de 2017. Uns cuantos meses de rodaxe, pero demasiada esixencia nun cadro que voaba nos postos altos da clasificación. Así, en xaneiro de 2018 Coby baixaba un banzo e enrolábase no Xuven Cambados, ao que non puido axudar a manter a categoría. Con todo, para el tratouse dun cambio a mellor. A LEB Prata deulle máis respiro, e máis minutos, e só hai que comparar a estatística dun escenario e doutro. No Prat, en 11 partidos, medias de 13,6 minutos e 3,6 puntos e 3,2 rebotes fronte aos 23,8 minutos e 11,6 puntos e 6,3 rebotes ofrecidos, igualmente en 11 duelos, en terras galegas.

Coby, quen estudou Socioloxía en Historia da arte en Columbia, terá unhas semanas para vivir o que moitos outros xogadores nin tocan de preto: días de traballo cos Knicks. Farao como membro do persoal de New York, aínda que o seu contrato só é para o training camp. Como conseguiu enrolarse nunha franquía da NBA un xogador que pasou desapercibido para todo o mundo hai uns meses? A explicación arróxaa Ian Begley, de ESPN. O xornalista asegura que nestes días Coby estivo facendo sesións de adestramento cos Knicks, mostrando unhas virtudes que convenceron ao corpo técnico da franquía. “Un xogador con moitas ganas de pelexar cada balón. Espectáculo e mates. E capacidade de tiro”. Así se definía Coby a La Voz de Galicia en xaneiro, cando chegou ao Cambados.
Coby, que puido xogar hai uns meses en destinos tan particulares para o baloncesto como Suíza, volve a New York, onde todo empezou dalgunha maneira en Columbia. Agora, vivirá con contrato temporal. Na esfera da NBA. O mínimo que sacará de aquí, dure o que dure a experiencia, é un nome estrela para poñer no currículo. Á beira diso, o de sempre, a oportunidade de que che vexan, de que gustes a alguén, de recalar na G League… de que a roda vire sempre o máis preto posible en grao sumo alto.