ANOVA LEI DE ESPECTÁCULOS EXPLICADA POLO PP

Entre as novidades principais, destacou que aumenta as atribucións dos concellos á hora de autorizar concertos e outras actividades no seu termo municipal

O novo texto, elaborado co consenso do sector, non establece ningún tipo de restrición á música en vivo nin establece novos requisitos

O director xeral de Emerxencias e Interior, Luis Menor, desprazouse hoxe ata Pontevedra para explicar os detalles desta nova normativa, que entrará en vigor o próximo 2 de xullo

O director xeral de Emerxencias e Interior, Luis Menor, desprazouse hoxe ata Pontevedra para dar conta das principais novidades da nova Lei de espectáculos públicos e actividades recreativas de Galicia, que entrará en vigor próximo 2 de xullo. No acto estivo acompañado polos delegados territoriais da Xunta en Pontevedra, José Manuel Cores Tourís, e Vigo, Ignacio López-Chaves.

Menor realizou un repaso polas principais novidades deste texto, que foi elaborado co consenso do sector co obxectivo de dotar de maior seguridade xurídica a este ámbito: é a primeira lei autonómica na materia. Entre as súas finalidades, puxo en valor que persegue protexer aos consumidores e aos menores, garantir a seguridade, e preservar o medio ambiente o patrimonio.

No eixo da seguridade, o director xeral explicou que a Lei dedica un artigo completo ás condicións técnicas e de seguridade que se deben cumprir. Neste sentido, aclarou que non se establece ningún requisito novo, senón que se reiteran as obrigas que xa existen na lexislación vixente porque se considerou que era necesario para garantir a seguridade dos seus usuarios. Pola mesma razón, o texto fai fincapé na necesidade de que os establecementos e organizadores acorden cun seguro de responsabilidade civil acorde á afluencia de xente prevista.

Neste ámbito inclúese tamén outras das novidades, que é o establecemento de que o control de acceso -naqueles locais que, pola normativa xa vixente agora, así o necesiten- ten que ser exercido por profesional habilitado. Ademais, condena de forma expresa calquera tipo de discriminación no dereito de admisión, dando así cobertura a aqueles clientes que crean que foran inxustamente tratados.

Maiores atribucións para os concellos

O director xeral resaltou, ademais, que a norma incrementa as atribucións que teñen o concellos en materia, tanto á hora de autorizar os eventos que teñan lugar no seu termo municipal, como noutros factores como as ampliacións de horario ou a capacidade de inspección e sanción. Deste xeito, simplifícase e axilízase a tramitación.

Por exemplo, as autorizacións de actividades extraordinarias -eventos que se realizan en establecementos e que non están amparados pola súa licenza- pasarán a depender exclusivamente do concello a partir do 2 de xullo. Ata agora, precisábase unha autorización da xefatura territorial da Xunta, previo informe do concello. 
Ademais, para simplificar aínda máis este proceso, a Lei faculta aos concellos para regular por ordenanza as actividades extraordinarias de escasa entidade (monólogos, contacontos, concertos...) e eximilas así de calquera trámite administrativo, se así o consideran.

En definitiva, a nova Lei non establece ningún tipo de restrición á celebración de eventos, así como tampouco establece novos requisitos aos establecementos máis aló dos que xa figuraban na lexislación e regulación vixente en materia de seguridade, urbanismo ou convivencia.