OPERATIVO EN AROUSA E PONTEVEDRA CONTRA A VENDA ILEGAL DE AMEIXA PORTUGUESA

Operación contra a venda ilegal de marisco nas Rías Baixas. É unha operación conxunta entre as policías española e portuguesa. En concreto da Policía Nacional e Autonómica de Galicia, a Policía Marítima de Portugal e os Gardacostas galegos. Durante estas últimas horas rexistraron varias depuradoras do Grove e de Cambados para atallar a comercialización ilegal de ameixa.

Varias depuradoras das rías de Arousa e Pontevedra foron rexistradas este martes en relación cun operativo que investiga a trazabilidad de ameixa procedente de Portugal. Este operativo internacional lévase a cabo a petición dun xuíz de Portugal contra unha trama de venda de marisco ilegal e desenvólvese noutras comunidades ademais de Galicia. En concreto, trátase dunha comisión rogatoria -procedemento de auxilio xudicial entre Estados- de Portugal. En Galicia, da causa encárgase o Xulgado de Instrución número 4 de Cambados (Pontevedra), aínda que este martes traballaron no caso as letradas dos catro xulgados, que autorizaron entradas e rexistros en diferentes lugares para que os practique a Policía Xudicial en compañía da Policía Marítima Portuguesa. Así, esta é unha operación enmarcada na cooperación internacional entre países. Polo momento non constan detidos na Comunidade galega. Neste operativo colaboran membros do servizo de Gardacostas, dependente da Consellería do Mar da Xunta de Galicia, así como da Policía Nacional.