A OCEAN LAVA GALICIA CHEGA A CAMBADOS EN SETEMBRO

A franquía canaria, cunha vintena de probas en toda Europa, chegará a Galicia o 10 de setembro.

Cambados e parte da comarca do Salnés serán o escenario da primeira edición do Ocean Lava Galicia que contará con 2 distancias, medio ironman e distancia 60.0.

Os triatletas tomarán a saída a partir das 8:30 da mañá na vila pontevedresa de Cambados, cunha natación en liña entre os portos de San Tomé e Tragove. A natación será a mesma para as dúas distancias. Posteriormente o sector ciclista desenvolverase cun tramo de ligazón, sobre un circuíto esixente, que será a 4 voltas para a distancia half (90 km) e 2 voltas (47,4 km) para a distancia 60.0. Por suposto o sector ciclista será sen drafting.

Por último a carreira a pé será a unha soa volta para as dúas distancias, é o tramo onde se percorrerá parte da Ruta Pai Sarmiento, coa peculiaridade de que se abandonará territorio continental na distancia half, para entrar na Illa de Arousa e volver novamente a Cambados.



Inscricións

A inscrición pode realizarse na páxina www.oceanlavagalicia.com e ata o 10 de xullo terá un prezo de 120,00 € na distancia half, mentres que a distancia 60.0 manterá unha tarifa de 50,0 €. Na distancia half aínda hai unha vintena de prazas a prezo reducido de 95,0 €.

A organización obsequiará tamén a todos os inscritos antes desa data coa camisola oficial da proba. Na distancia ten un límite de 500 participantes e a distancia 60.0 é moito máis exigua con 150 prazas que aos poucos van diminuíndo.

Kenneth Gasque, director de Ocean Lava e organizador durante xa 26 edicións do Ironman de Lanzarote, estará proximamente en Galicia para presentar a proba e coordinar coa organización do evento todos os dispositivos para que a estrea no noroeste peninsular da franquía sexa un éxito.

A Mancomunidade do Salnés e os concellos de Cambados, Vilanova de Arousa e A Illa de Arousa, xunto a diversos clubs e organizacións da comarca poñerán toda a colaboración e os medios necesarios ao seu alcance, envorcándose coa proba á que xa se van unindo aos poucos patrocinadores.

Máis información: www.oceanlavagalicia.com

OCEAN LAVA, con orixe en Lanzarote, é unha da competicións de longa distancia máis prestixiosas do mundo.
Fundada por Kenneth Gasque, director de carreira do Ironman Lanzarote e lenda do mundo do tríatlon é un espectacular evento deportivo.

Gasque, pioneiro hai 25 anos ao traer o Ironman a Lanzarote e artífice de que as series Ironman sigan hoxe na illa, foi tamén protagonista ao iniciar novos eventos.

OCEAN LAVA, é o máis importante e ademais de celebrarse en Lanzarote, na súa expansión xa ha transcendido as fronteiras do arquipélago canario e hoxe presenta probas en distintos países europeos: Ucraína, Holanda, Montenegro, Malta, Dinamarca.....
Cada ano, miles de triatletas chegan desde todo o mundo a estes novos destinos para participar neste fabuloso espectáculo deportivo.