O C.R.D.O RIAS BAIXAS ARRANCA O PROCESO ELECTORAL

As eleccións para a renovación dos órganos de goberno do Consello Regulador da Denominación de Orixe Rías Baixas, do mesmo xeito que o resto de Consellos Reguladores agroalimentarios de Galicia, celebraranse o domingo, 9 de xullo. Serán as segundas que se organizan desde o Consello Regulador e, foron convocadas segundo a orde do 3 de abril da Consellería do Medio Rural, pola que se convocan eleccións e dítanse normas para a renovación dos órganos de goberno de determinados Consellos Reguladores do ámbito agroalimetario. Nas presentes eleccións estarán implicadas 183 adegas e 5.500 viticultores.
Actualmente o Consello Regulador ultima a revisión dos censos, que se expoñerán a partir do 3 de maio nas Oficinas Agrarias Comarcais, Concellos, Sede do Consello Regulador e servizos centrais e xefaturas territoriais da Consellería do Medio Rural co obxecto de que os interesados poidan presentar alegacións ata o 12 de maio. Posteriormente, desde o 2 de xuño, farase a exposición dos censos definitivos nas mesmas localizacións.



O prazo para presentar candidaturas estenderase desde o día 22 de maio ata o 2 de xuño, ambos inclusive. Poden presentar candidaturas as organizacións profesionais agrarias e as asociacións profesionais. Poderán igualmente presentarse candidaturas independentes, que requirirán un 10 % de avais do seu censo ou subcenso.



Os 22 vogais elegibles do Pleno repártense en 3 censos: o de viticultores, con 9 representantes (que á súa vez se reparten en 5 vogais para os que posúan 2 hectáreas ou menos, e 4 para os inscritos que teñan máis de 2 hectáreas); o de adegas, con 9 vogais (repartido entre as industrias cuxa media de viño amparado nos tres últimos anos sexa igual ou menor a 100.000 litros, aos cales lles corresponden 2 vogais, e 7 para as de máis de 100.000 litros); e finalmente o censo de cooperativas que ten 4 vogais. Ademais destes, a Consellería do Medio Rural designará outros 2 vogais delegados.

Concluídos estes prazos, o día 29 de xuño iniciarase a campaña electoral, que se prolongará ata o 7 de xullo. De momento, non está pechado o número de mesas para a votación, aínda que se traballa nunha cantidade similar ao das últimas eleccións, que foron 13. Segundo recóllese no decreto 4/2007 e no Regulamento do Consello, os cargos de presidente e vogais das mesas electorais, que serán designados por sorteo entre os electores que saiban ler e escribir, serán obrigatorios e o seu incumplimento pode deribar na suspensión de ata dous anos nos dereitos que lle correspondan como inscrito na denominación.



Convén lembrar, ademais, que os electores, sen necesidade de xustificación de causa, poderán emitir o seu voto por correo, tras a súa solicitude persoal ante a secretaría do Consello Regulador, e o cumprimento dos requisitos recolleitos en artigo 53 do decreto 4/2007, polo que se regulan as denominacións xeográficas de calidade do sector alimentario e o seu consello regulador. Para iso dispoñerán dun prazo que vai desde o día de exposición dos censos definitivos (2 de xuño) ata o décimo día anterior ao da votación.



Tras as votacións do día 9 de xullo, está previsto que o día 11 do mesmo mes a Xunta Electoral Central proclame os vogais electos e, a partir do 17 de xullo abrirase un prazo para que a Consellería do Medio Rural convoque aos novos vogais electos para tomar posesión da súa acta e, na mesma sesión, elixir por maioría ás persoas que vaian ostentar os cargos de presidente e vicepresidente.



Os interesados poden descargarse a orde de convocatoria de eleccións na páxina do DOG ou, tamén na páxina web do Consello Regulador da D.Ou. Rías Baixas, neste apartado de noticias.

Ficheiro   Ficheiro