A PLATAFORMA TECNOLÓXICA DO VIÑO CELEBRARÁ O SEU ENCONTRO ANUAL EN CAMBADOS

Viñas en espaldera no Salnés

Cambados,  Cidade Europea do Viño 2017, foi o lugar elixido para a celebración do Encontro Anual 2017 da Plataforma Tecnolóxica do Viño, que terá lugar os días 4 e 5 de maio. Unha cita imprescindible para o sector vitivinícola, na que tanto socios como non socios da PTV, están convidados a gozar dunha programación que abarcará actividades técnicas e lúdicas. Todo iso, nun escenario de excepción, Adegas Martín Códax.

O evento, patrocinado polo Consello Regulador Rías Baixas e Adegas Martín Códax, conta ademais coa colaboración do Concello de Cambados, ABANCA e o Centro para o Desenvolvemento Tecnolóxico Industrial (CDTI), e estruturarase ao redor da seguinte axenda:

XOVES, 4 DE MAIO

O Ministerio de Economía, Industria e Competitividade, a Xunta de Galicia, o Consello Regulador Rías Baixas e a propia Presidencia da PTV, darán o pistoletazo de saída ao Encontro, o xoves 4 de maio ás 16.30.

A continuación, a Comisión Técnica da PTV, representada por Juan Vázquez (Adegas Martín Códax), Mireia Torres (Miguel Torres, SA), Salvador Guimerá (González-Byass), Alberto Guadarrama (Adegas Matarromera), Antonio Palacios (Laboratorios Excell) e Sergi de Lamo (VITEC), presentará a nova Axenda Estratéxica de Innovación do Viño para o período 2017-2020. Documento de referencia para a I+D+i do sector, froito dunha profunda reflexión científico-técnica, que recolle as principais liñas de actuación en I+D+i que o sector debe abordar nos próximos anos, e que supoñerán a base para o desenvolvemento de futuros proxectos de innovación.

Ademais, os consultores enológicos, Pablo Ossorio e Cristina Mantilla, achegarán aos asistentes unha visión acerca das tendencias de mercado e consumo no sector do viño, así como unha valoración da presenza dos viños galegos no mundo.
O broche de ouro á primeira xornada poñeraa "Galicia, berce da Innovación", un espazo networking que pretende render unha particular homenaxe á innovación vitivinícola galega por medio dunha degustación de viños procedentes de adegas galegas socias da PTV, así como dos últimos avances científico dos centros tecnolóxicos da zona, que tamén forman parte da PTV.

VENRES, 5 DE MAIO

A xornada do día 5 de maio comezará coa celebración da Asemblea Xeral de Socios 2017, cuxa asistencia queda reservada exclusivamente aos Socios da PTV e na que se realizará un balance do ano 2016 e fixaranse os obxectivos e accións estratéxicas para o próximo período 2017-2018. De maneira paralela, e dirixido a entidades non socias da PTV, celebrarase unha Cata Técnica de viños de Martín Códax, procedentes ou relacionados con Proxectos I+D+i sobre viticultura de precisión.

A partir das 12.15 os asistentes a ambas as actividades paralelas están convocados a un bloque técnico sobre perspectivas futuras de dous grandes retos -e preocupacións- do sector do viño: a sustentabilidade e as enfermidades da madeira. Encabezado por Fernando Chivite, Delegado Científico do Comité de Sustentabilidade da OIV, este bloque abordará ademais os avances do proxecto europeo WINETWORK, da man de INGACAL e FEUGA, así como os avances tecnolóxicos que Biome Makers e Monet Viticultura están a desenvolver en ambos os campos.

Clausúraa do Encontro Anual 2017 estará a cargo de Fátima Abal, Alcaldesa de Cambados, e José Martínez, Presidente de Adegas Martín Códax. Finalmente, tras un cocktail-networking, os asistentes ao Encontro poderán gozar dunha visita guiada a dúas adegas do Val do Salnés: Mar de Frades e Pazo Baión.