O CONCELLO DE CAMBADOS DI NON AS ESPECIES INVASORAS

Especies como a coñecida flor da pampa ou plumacho  ocupaban espazos como o xardín da Merced ou a rotonda de Corvillón.

Unha vez que se realizaron traballos de acondicionamento polo equipo de xardinería do Concello, optouse pola eliminación dos exemplares de Cortaderia selloana; nuns traballos que recibiron asesoramento polo Servizo de Conservación da Natureza da Xunta de Galicia.

Eliminar especies clasificadas como invasoras require dun protocolo específico, isto débese a que é preciso minimizar o risco de expansión das sementes, tanto na fase de retirada, como no transporte e por último na súa eliminación; entre outros factores.

Resulta importante que os veciños se dean conta da problemática das especies invasoras e que contribúan a non proliferación de máis exemplares. Algún veciño xa puxera de manifesto a súa oposición a utilización destes exemplares; neste mesmo senso a Xunta tamén investe na erradicación de especies invasoras, polo que a colaboración entre a administración é a poboación faise indispensable.

Os exemplares que había no concello tiñan xa un porte importante polo que o risco de proliferación era maior.

Cabe tamén dicir que o emprego de herbicidas no noso Concello estase a reducir a mínimos, xa que recentes estudos poñen de manifesto a posibilidade de afección da saúde. Poñer en risco a saúde para eliminar plantas da nosa contorna non é razoable.