CAMBADOS PROTAGONIZA DESAFÍO NOS FOGÓNS ESTE XOVES NA TVG

Programa concurso de cociña que percorre diferentes vilas galegas (Allariz, Vilagarcía, Celanova, Padrón, Ribeira, Muros, Silleda, Noia, Sanxenxo, Betanzos, Cambados, O Grove, Viveiro e Xinzo) para atopar os mellores cociñeiros afeccionados da nosa gastronomía.

Este xoves ás 22:30 tócalle o turno a Cambados.

Cada semana, Xosé Barato e Federico Pérez, dous rostros ben coñecidos da TVG, visitan estas vilas para atopar e seleccionar tres concursantes con dotes para a cociña, moito humor e ganas de pasalo ben e competir no estudio de “Desafío nos Fogóns”. Pero, ante todo, o seu obxectivo é demostrar que son os mellores preparando produtos típicos das súas respectivas vilas, gañar en cada edición 1.000 euros e continuar a súa permanencia no programa para seguir demostrando a súa destreza nos fogóns e defendendo a súa vila. 

Os presentadores de “Desafío nos Fogóns” non están sós neste reto. Cada edición, Héctor López, membro do grupo Nove e xefe de cociña do Restaurante España, e Churra Costa, unha cociñeira da súa casa, ex-concursante dun coñecido espazo de cociña e colaboradora de “Sopa de Festa”, son os encargados de realizar as valoracións máis técnicas dos aspirantes, formando tamén parte das catas finais das probas do programa. 

A premisa principal de “Desafío nos Fogóns” é entreter o espectador. Cada entrega está chea de ritmo, que á súa vez vai acompañado dun pequeno compoñente de “reality”. Ao longo do programa ofrécense as impresións dos concursantes, en que lembran os mellores momentos vividos e como se sentiron en cada momento.