UN PASO MÁIS NO PROCESO A RAFAEL LOUZÁN

O concelleiro de Pazos de Borbén Severino Reguera, do Partido Popular, declarou hoxe nos xulgados de Cambados, que investigan un presunto delito de aceptación de suborno por parte do ex-presidente da Deputación, o popular Rafael Louzán.

Regueira comparece como investigado na causa e a petición propia. O caso comezou cunha denuncia anónima sobre posibles sobreprezos no alugueiro duns locais propiedade de Louzán e da súa muller.
A nova xuíz de Cambados que instrúe o caso por posible suborno contra o entón presidente da Deputación de Pontevedra e actual responsable do PP en Pontevedra, Rafael Louzán, citou a declarar para hoxe ao concelleiro de Pazos de Borbén, Severino Reguera, tamén implicado, que comparece a petición propia.

Coa intención de presentar novas probas e documentación que pediu a fiscalía, Severino Reguera solicitara hai meses esta comparecencia pero o cambio de xuíz instrutor e problemas de saturación no calendario xudicial atrasárona ata agora.

Esta é a primeira vez que o político se someterá ao interrogatorio da xuíz e o fiscal, despois de que tanto el como Rafael Louzán acolléranse ao seu dereito a non declarar na vista preliminar que tivo lugar o 24 de marzo do pasado ano. Tres meses antes de que o PP perdese a deputación e o seu presidente abandonase o seu escano -tras vinte anos no ente provincial- para dedicarse ao partido e á Federación Galega de Futbol da que é presidente.

A declaración de Reguera podería ser clave, xa que o asunto entraría nunha nova fase para que o fiscal de delitos económicos Augusto Santaló puidese pedir novas dilixencias. En caso contrario, o fiscal xa tería base suficiente para acusar a ambos os políticos ou pola contra acordar o seu arquivo.

Unha denuncia anónima que entrou na fiscalía a finais de 2013 deu lugar a unha querela por parte do fiscal por un presunto delito de suborno continuado contra Louzán e a súa muller, como propietarios duns baixos alugados a Reguera ao que lle imputa un posible suborno impropio.