SOMOS CAMBADOS REÚNESE CO PATRÓN MAIOR DE CAMBADOS

O Candidato a Alcaldía, Tino Cordal, e varios membros da Plataforma veciñal Somos Cambados mantiveron no día de onte unha xuntanza con varios membros do cabildo e o Patrón Maior da Confraría de Cambados. Esta reunión foi a primeira das distintas xuntanzas que vai celebrar a candidatura veciñal Somos Cambados coas distintas organizacións sectoriais existentes na nosa vila, co obxecto de coñecer de primeira man as súas problemáticas. Non é casualidade que a primeira reunión de membros da candidatura SOMOS CAMBADOS fose na Confraría, pois entendemos que existe certo paralelismo entre a anterior Confraría e o Concello actual (ambos gobernados polo PP e salpicados por casos de corrupción). Cabe lembrar que, en xuño do ano pasado, a xente do mar formou unha candidatura xoven, preparada, con ideas e ilusión, e foi quen de derrotar a un Patrón Maior (presidente das confrarías de Galicia) apoiado pola Xunta e respaldado por Luis Aragunde e o Partido Popular de Cambados. A candidatura que gañou as eleccións á Confraría demostrounos que, a pesar da utilización por parte do PP de todos os recursos humanos e materiais, é posible derrotalos.

Dentro desta rolda de contactos na que nos imos reunir con todos aqueles sectores, asociacións e entidades que nos queiran recibir, Somos Cambados vai analizar todas as propostas incluídas no seu Programa de Goberno que poidan influír nestes sectores, así asumir como súas todas as inquedanzas e problemas de cada sector.

Na reunión coa Confraría tratouse a situación que está a atravesar un dos principais sectores, e motor, da economía cambadesa. Así, trasladáronsenos as alarmantes conclusións do informe de viabilidade do sector realizado polas confrarías de pescadores da Ría de Arousa. Os altos custes que están a sufrir para poder manter a súa actividade produtiva e, en contraposición, o alarmante descenso de capturas e a baixada dos prezos na lonxa, o que levou a solicitar a prestación por desemprego a máis de 70 empresas nos primeiros meses deste ano, xunto cos traballadores destas mesmas.

Dende Somos Cambados consideramos urxente a erradicación dos vertidos ao mar, pois están a danar os distintos bancos marisqueiros e pesqueiros de Cambados, así como a elaboración de análises periódicos da contaminación non só nas principais zonas extractivas, senón tamén nas desembocaduras dos ríos, e que estes análises se fagan públicos con periodicidade. Tamén se falou dos servizos que se prestan aos nosos mariñeiros nos peiraos de Cambados, e as altas taxas que impón Portos de Galicia pola utilización das mesmas; xa que non só se repercute por metro cadrado, senón que tamén se abona o canon en función das vendas de cada armador. Estas taxas son as mesmas para cada peirao en tódolos portos de Galicia, pero, pola contra, os servizos que se prestan non son os mesmos no peirao de Tragove que noutros portos próximos a Cambados, polo que consideramos preciso que os servizos que se prestan sexan equiparados entre si.

Por ultimo tamén estivemos comentando a pésima situación na que se atopa o peirao de amarre da Illa das Goritas, e a necesidade de instalar un novo peirao flotante en paralelo ao de Santo Tomé, para facilitar o amarre de moitas embarcacións de artes menores nunha zona de abrigo. Dende Somos Cambados queremos expresarlle o noso agradecemento a Confraría de Cambados por atendernos nesta reunión e trasladarnos as carencias e propostas dun dos principais sectores de Cambados.