XA VEÑEN OS REIS MAGOS, XA VEÑEN OS REIS MAGOS

A Xunta de Goberno da Deputación de Pontevedra aprobou hoxe a  adxudicación definitiva e a ratificación da aceptación dos lotes da herdanza de Alicia Crespí González para a institución provincial. Algo do que xa informamos no seu momento.

O sorteo dos lotes tivo lugar en Madrid o pasado 20 de febreiro ante o notario Luis Quiroga Gutiérrez e á Deputación de Pontevedra correspondéronlle os lotes 4 e 7, que teñen un valor total de 734.194 euros.

O lote núm. 4 ten un valor de 367.097 € e inclúe  un piso no núm. 7- 3º da avenida de Badajoz en Madrid (290.000 €); mobles e enseres por valor de 37.250 €; e valores mobiliarios (contas correntes e carteiras) por 39.846,8 €.

O lote núm. 7 ten un valor de 367.097 € e inclúe un piso no núm. 2 – 1º esquerda da rúa Pico de Alba en Madrid, (130.000 €); mobles e enseres por valor de 17.219 €; e valores mobiliarios (contas correntes, fondo de renda fixa, fondos carteiras) por un valor total de 219.876.

A herdanza de Alicia Crespí foi repartida en 7 lotes: o primeiro para Cáritas Española, para unha residencia de anciáns; o segundo e mais o quinto para os irmáns Luis e Antonio Crespí González, para restaurar edificios antigos en Santiago de Loureiro, en Cotobade; o terceiro para a Universidade de Vigo, para a Escola de Maxisterio; o cuarto e o sétimo para a Deputación de Pontevedra e o Museo Provincial; e o 6 para as Irmás Doroteas,  para a sede e o colexio.

O valor total da herdanza de Alicia Crespí estaba valorado en 3,4 millóns de euros os seus bens (pinturas, vivendas, mobles e útiles) e en 793.575 € os depósitos, contas, fondos e seguros. O testamento foi outorgado en Madrid en 1995. Ó seu viúvo, Ángel González Ferrero, deixoulle o usufruto e o 12,5 % do valor dos bens (283. 157 €).

Os bens incluían 5 pisos en Madrid e un na Toxa; unha vivenda con rocho e praza de garaxe en Madrid; outras prazas de garaxe e unha leira en Cotobade, ademais de distintos valores.

O legado específico para o Museo de  Pontevedra son 17 mobles, 9 obras de arte (pintores anónimos do século XIX, de José Fernández Lamas, de Teresa Abril Martorell, José Luis Lagos e outros) e varias obras de cerámica, instrumentos musicais antigos e coleccións de fotografías.

A Xunta de Goberno da institución provincial agradeceu, por medio do seu presidente Rafael Louzán, o legado, e destacou o labor altruísta e solidario de Alicia Crespí González "porque o seu legado, xunto ó doutros mecenas pontevedreses, contribúe ó engrandecemento do Museo de Pontevedra e a convertelo nunha referencia en Galicia e España". Louzán destacou a "exemplar  confianza de Alicia Crespí nas institucións, sobre todo hoxe cando desde algún sector seméntanse dúbidas sobre elas".