DESGRACIADAMENTE A COMARCA VOLVE SER PROTAGONISTA POR TEMAS DE NARCOTRÁFICO

Un espectacular operativo contra o tráfico de drogas desenvolvido durante toda a xornada deste mércores na comarca de Arousa deixou un balance de, ata o momento, tres detidos, dos cales dous son axentes da Garda Civil.

Os arrestos realizounos o Equipo Contra o Crime Organizado (ECO) da Garda Civil no marco dunha intervención que incluíu o uso dun helicóptero e de varias patrullas por terra.

Polo menos unha das tres detencións produciuse no Concello de Vilanova de Arousa pola tarde, pero o operativo desenvolveuse durante todo o día. O terceiro detido a maiores dos axentes da Garda Civil é veciño da comarca e supostamente estaba relacionado previamente co narcotráfico

O amplo despregamento policial 

chamou a atención dos veciños a primeira hora da tarde, cando máis dunha decena de axentes confluíron na zona das Sinas e se despregou tamén un helicóptero nas inmediacións.

Testemuñas presenciais relataron que os axentes levaban as armas á vista e o rostro tapado por pasamontañas (unha precaución habitual neste tipo de corpos policiais de investigación especializada) e desprazábanse en vehículos camuflados.