AS FARAÓNICAS OBRAS DE LOUZÁN OBTAN A UN PREMIO A NIVEL EUROPEO

O proxecto Pousadas do Salnés da Deputación Provincial de Pontevedra aspira a facerse co premio Edén de Excelencia Turística, que promove a Comisión Europea e que ten como obxectivo poñer en valor destinos emerxentes comprometidos coa sustentabilidade social, cultural e medioambiental.

O galardón céntrase cada ano nunha característica específica dos destinos e neste 2013 o tema sobre o que xirará o concurso e ao que se lle prestará unha especial atención á hora de decidir ao gañador é a accesibilidade, principal aposta das Pousadas do Salnés.

En cada edición, os premios Edén conceden o recoñecemento a un destino de cada país presentado, polo que As Pousadas, que contan co apoio da Dirección Xeral de Turismo, compiten con outros seis destinos nacionais, que son Cartagena, Laredo, as praias de Valencia, dúas Vías Verdes de Girona e o Parque Natural dos Pre-Pirineos.

Para facer a valoración definitiva en base á que se decidirá cal é o gañador entre os sete presentados, desprazouse ata Pontevedra unha técnica de Segittur, que realizou unha análise exhaustiva do proxecto e que elaborará o informe que podería darlle a esta provincia un novo galardón turístico que pon en valor a calidade do destino.

As Pousadas do Salnés son unha iniciativa pioneira para a creación dun produto turístico accesible e sostible na comarca do Salnés. O proxecto pretende dar resposta á necesidade de diversificar a oferta turística da comarca mediante a creación de 4 establecementos hoteleiros de 4 estrelas con máis de 100 habitacións dobres totalmente accesibles, así como os 50 quilómetros de rutas de sendeirismo que inclúen a do Umia, a do Cañón, a do San Martiño, a ruta da Pedra e da Auga, a do río Chanca, a do río Currás, e a de Dorrón. A elas hai que sumar a recuperación de escavacións arqueolóxicas nos castros de A Lanzada e O Castro (Ribadumia), tamén accesibles.

Agardemos que de confirmarse o premio, este sirva para que a comarca aumente o número de visitantes e que descenda o número de parados aínda que sexan votantes, afiliados e familiares de certo partido político.