O C.R.D.O. RIAS BAIXAS E O SANTANDER FIRMAN UN ACORDO PARA FACILITAR O ACCESO A OS SERVIZOS FINANCEIROS DA ENTIDADE

O presidente do Consello Regulador da Denominación de Orixe Rías Baixas, Juan Gil de Araujo, e o director territorial de Empresas do Grupo Santander, Miguel Alonso Fernández, asinaron esta mañá un convenio de colaboración para facilita o acceso aos servizos financeiros de Grupo Santander ás bodegas amparadas por esta denominación de orixe. Juan Gil de Araujo explica que con este acordo "desde o Consello Regulador pretendemos, nestes tempos de dificultade económica, facilitar ás empresas o acceso aos servizos financeiros nas mellores condicións posibles". Un punto no que coincidiu Miguel Alonso, quen sinalou que "ofreceremos unhas condicións definidas e adaptadas ao perfil e as necesidades das bodegas e poñerémonos a súa disposición para apoialas en todos os problemas aos que se enfrontan". Neste sentido, destacou a vocación de internacionalización que teñen as bodegas da DO Rías Baixas "xa que se identifica coa filosofía que identifica ao Grupo Santander e aos seus clientes". Facilitar o acceso ao crédito O presidente do CRDO Rías Baixas explicou que este convenio, aprobado polo Pleno do Consello Regulador o pasado 27 de xuño, "servirá para que todas as empresas da denominación teñan maiores facilidades de acceso ao crédito e sexa moi beneficioso para todas elas". Un obxectivo ao que se uniu Miguel Alonso, que confía en que "deste convenio de colaboración sairán negocios e esperamos unha boa resposta por parte das bodegas da DO Rías Baixas". Un convenio de colaboración que se integra dentro do denominado "Plan 10.000" do Grupo Santander para facilitar o acceso das pymes ao crédito. Na actualidade, a Denominación de Orixe Rías Baixas ampara a un total de 177 bodegas.