A XUNTA ADIANTA UN DIA OS CAMBIOS DE RESTRICIÓNS

Os cambios de niveis de restricións en Galicia entrarán en vigor este xoves

Sanidade confirma que adianta un día a publicación das novas medidas no DOG, polo que a partir de mañá aplicaranse estas novas limitacións O comité clínico decidiu onte que municipios galegos cambian de nivel de restricións en función da súa incidencia. Hoxe, o conselleiro de Sanidade anunciou que as medidas serán publicadas no Diario Oficial de Galicia hoxe mesmo e entrarán en vigor esta mesma noite. Por tanto, desde mañá aplicaranse os cambios decididos polos expertos. Trátase dun día antes do habitual, pois nas últimas semanas estes cambios producíanse os venres. Doutra banda, o sábado entrará en vigor a orde que volve permitir as reunións de non conviventes en vivendas particulares de Galicia. Esta limitación estableceuse antes de Semana Santa para evitar unha maior transmisión do virus no ámbito persoal e familiar. Cambios nos niveis Estes son os principais cambios: Pasan a nivel extremo A Pobra do Caramiñal e O Grove e abandónao Beade. Estarán en nivel alto os municipios de Pobra do Brollón, Rábade, O Irixo, Monterrei, A Illa de Arousa e Carral. As novidades son A Illa de Arousa e Carral, e abandónano o nivel Abegondo, Baiona, Cortegada, Ortigueira, Padrenda, Pazos de Borbén, Sanxenxo e O Saviñao. Estarán en nivel medio os municipios de Beade, Cortegada, Padrenda, O Carballiño, Boimorto, Sanxenxo, Meis, Cangas, Gondomar, Moaña e Baiona. O Carballiño é a novidade, e abandónano Vilardevós, Celanova, Ribadavia, Xinzo de Limia, Bergondo, A Coruña, A Laracha, Arteixo, Betanzos e Camariñas. O resto de municipios galegos están en nivel medio-baixo.