ALERTA LARANXA NAS RÍAS BAIXAS

Galicia estará en alerta por vento, que será laranxa nas Rías Baixas e na Costa da Morte

Meteogalicia prevé para o mércores unha alerta amarela por choivas no interior de Pontevedra e no sur e suroeste da Coruña

Meteogalicia activou para este martes diferentes niveis de alerta por fortes ventos na comunidade galega. O nivel será laranxa nas Rías Baixas e na Costa da Morte, onde se esperan refachos de forza 8 no mar, mentres que será amarelo no resto da costa e na maior parte do interior galego.

Segundo o boletín de alerta de Meteogalicia, este fenómeno comezará ao redor das 09.00 da mañá na Costa da Morte e nas Rías Baixas cun aviso amarelo por ventos de forza 7, que pasarán a ser forza 8, que elevará o risco para a laranxa, a partir das 12.00 horas.

Mentres, activarase o aviso amarelo, tamén a partir do mediodía, na costa noroeste da Coruña, no interior desta provincia e na comarca lucense da Mariña. Para estas zonas agárdase vento do sur con refachos de máis de 80 quilómetros por hora.

No resto de Galicia, a excepción da franxa norte da provincia de Ourense e o sur de Lugo, a alerta entrará en vigor a partir das 21:00 horas con refachos de entre 70 e 80 quilómetros por hora. Esa mesma noite, no mar da Mariña, haberá forza de vento 7.

Toda esta situación continuará a primeira hora do día o mércores. Non obstante, a isto engadirase outro aviso amarelo por precipitacións de máis de 40 litros por metro cadrado en 12 horas no sur e suroeste da Coruña e no interior de Pontevedra.