PONTEVEDRA-SALNÉS A PIQUES DE BAIXAR DOS 1000 ACTIVOS

Arquivo

Coronavirus Pontevedra: 39 contaxios novos e baixan a 1.025 os casos activos Cada vez menos contaxios na área sanitaria de Pontevedra e O Salnés, que está a piques de baixar dos 1.000 casos activos. Segue mellorando a estado da área sanitaria de Pontevedra e O Salnés, que parece que definitivamente conseguiu que baixen os contaxios diarios de COVID-19, o que provocou que o número de casos activos comece a baixar día tras día. Os 1.025 que hai hoxe son 142 menos que o sábado pasado. Nas últimas 24 horas producíronse 39 contaxios novos e 79 altas, o que fai que baixen en 40 persoas os casos activos, pasando dos 1.065 de onte a 1.025 hoxe.

Segue baixando aos poucos a incidencia de toda a área sanitaria, co único caso de datos anormalmente altos en Vilaboa polos positivos na residencia de maiores Pontevedra. O resto da área continúa baixando aos poucos, con zonas practicamente libres de COVID-19 como Bueu, Barro, Catoira ou Campo Lameiro. Cambados volve baixar, hoxe hai 54 casos, un menos que onte venres, 18 menos que o domingo pasado.

O número de pacientes hospitalizados sobe de 50 a 51 persoas, distribuídos en 45 pacientes no CHU de Pontevedra (36 en planta e 9 na UCI), 2 no Hospital Público do Salnés e 4 no Quirónsalud de Pontevedra. 

Na área sanitaria de Pontevedra-O Salnés que inclúe as comarcas de Pontevedra, O Salnés, Caldas (excepto Valga e Pontecesures), Tabeirós-Terra de Montes (salvo a Estrada) e os municipios de Marín e Bueu pertencentes ao Morrazo, desde o inicio da pandemia tivo 5.669 casos de coronavirus, con 59 falecementos, 4.585 altas e 1.025 casos activos nestes momentos.