MÁIS DE MEDIO CENTO DE NOVOS CONTAXIOS EN PONTEVEDRA-SALNÉS

A área metropolitana pontevedresa e Vilagarcía de Arousa mantéñense en alerta vermella. Baixan os hospitalizados.

A área sanitaria de Pontevedra e O Salnés segue sumando numerosos casos novos de coronavirus e aumentando o número de infectados activos. Nas últimas 24 horas producíronse 53 contaxios novos e 36 altas, o que fai que suban en 17 persoas os casos activos, pasando dos 622 de onte a 639 hoxe. Mantéñense os catro municipios que había en alerta vermella, Vilaboa baixa a alerta amarela e Cerdedo-Cotobade sobe a alerta amarela. Alerta nivel 3 (vermella): Marín, Poio, Pontevedra e Vilagarcía de Arousa. Alerta nivel 2 (laranxa): Cuntis. Alerta nivel 1 (amarela): Caldas de Reis, Cambados, Cerdedo-Cotobade, Sanxenxo, Vilaboa e Vilanova de Arousa.

Cambados ten hoxe 21 casos activos, un máis que onte.

O número de pacientes hospitalizados baixa de 50 a 48 persoas, distribuídos en 42 pacientes no CHU de Pontevedra (35 en planta e 7 na UCI), 4 no Hospital Público do Salnés e 2 no Quirónsalud de Pontevedra. A área sanitaria de Pontevedra-O Salnés inclúe as comarcas de Pontevedra, O Salnés, Caldas (excepto Valga e Pontecesures), Tabeirós-Terra de Montes (salvo a Estrada) e os municipios de Marín e Bueu pertencentes ao Morrazo. Desde o inicio da pandemia tivo 2.974 casos de coronavirus, con 28 falecementos, 2.307 altas e 639 casos activos nestes momentos.