PRESENTADO O "PLAN DE IMPULSO AO TURISMO"

O presidente do Goberno, Pedro Sánchez, acaba de presentar o Plan de Impulso ao Turismo acompañado na súa comparecencia por representantes do sector e outros membros do goberno. O principal obxectivo do Plan é apoiar ao sector turístico na súa volta á actividade tras o fin do estado de alarma e a apertura das fronteiras. O presidente sinalou que “é o momento de dar un paso máis, de reactivar e volver impulsar o sector turístico, porque o turismo forma parte dos nosos costumes e do noso benestar. É algo noso”. O plan conta cunha inxección de 4.262 millóns de euros e baséase en cinco alicerces fundamentais. En primeiro lugar búscase consolidar a confianza de España como destino 360 graos, expresando para iso o presidente que “ debemos apostar por que todos os elos da cadea de valor do sector turístico incorporen medidas hixiénico-sanitarias que permitan ofrecer confianza ao viaxeiro”.
Outro alicerce importante son as medidas de apoio ao sector empresarial, establecendo para iso un tramo preferente de recursos de 2.500 millóns de euros para ao sector turístico. Así mesmo, concederase un período de moratoria de 12 meses a aquelas operacións financeiras con garantía hipotecaria, para inmobles afectados por actividades turísticas, incluídas os aloxamentos.
O terceiro alicerce apunta a mellorar a competitividade do sector turístico achegando o Goberno 850 millóns de euros para impulsar un modelo baseado na sustentabilidade e a dixitalización. Outro obxectivo é o de reforzar o sistema de intelixencia turística mediante a creación dun observatorio que contará con “ indicadores, datos e información en tempo real”, puntualizou Pedro Sánchez. Por último, van utilizar as ferramentas de márketing e promoción para situar a España como destino seguro e sostible. Sánchez tamén salientou que “este é un plan imprescindible e determinante para o relanzamento da economía española”., apuntando tamén outras medidas económicas que se activaron no seu momento, como os ERTE, que han beneficiar tamén o sector turístico. Finalmente e xunto a este plan deuse a coñecer unha campaña de promoción do turismo nacional que se poñerá en marcha inmediatamente de fronte ao verán, denominado “Descobre o incrible”, onde se fai fincapé no slogan “ o incrible está máis preto do que crees”.