10.252 OS PACIENTES CURADOS EN GALICIA CON COVID-19

Galicia rexistra este luns un total de 515 casos de coronavirus activos (38 deles vinculados a residencias), nove menos que onte e máis de cen menos que hai unha semana. Por medio do seu balance estatístico diario, a Consellería de Sanidade informou de que 19 pacientes permanecen en unidades de hospitalización, 495 atópanse nos seus domicilios e só un está a ser tratado en UCI. Así mesmo, un total de 10.252 persoas superaron a enfermidade e os falecementos mantéñense en 618, os mesmos que hai xa varios días. As PCR realizadas, por outra banda, cífranse en 151.390. Ademais a distribución por áreas sanitarias é nestes momentos a seguinte: 113 atópanse na Coruña, 30 na de Lugo, 43 na de Ourense, 16 na de Pontevedra, 193 na de Vigo, 107 na de Santiago e 13 na de Ferrol.

O balance diario que ofrece a Consellería de Sanidade sobre a afectación do Covid-19 reflicte este luns 8 de xuño unhas cifras idénticas ás do domingo en Pontevedra e O Salnés.

Por cuarta xornada consecutiva, na área sanitaria permanecen activos 16 casos de coronavirus, sen que se rexistren ingresos hospitalarios con positivo activo xa que todos os afectados evolucionan nos seus respectivos domicilios.

Tampouco se rexistraron cambios na cifra de curacións, con 881 pacientes recuperados desde o inicio da pandemia e 16 persoas falecidas.