NINGUNHA MORTE NA PRIMEIRA ACTUALIZACIÓN DA MAÑÁN

Hoxe 29 de abril produciuse un novo repunte no diagnóstico de casos de coronavirus en Galicia, coa confirmación de 138 casos para facer un total de 9466 desde o inicio da pandemia. A cifra de hoxe mércores é aínda así inferior aos 166 contaxiados novos que se rexistraron o mesmo día da semana pasada. A tendencia segue sendo descendente, e o crecemento en porcentaxe foi do 1,47%.

A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 3.526, deles 880 son da área da Coruña, 244 da de Lugo, 715 da de Ourense, 215 da de Pontevedra, 808 da área de Vigo, 505 da de Santiago, e 159 da de Ferrol.

Do total de pacientes positivos, 73 permanecen en UCI, 482 están en unidades de hospitalización e 2.971 no domicilio. Polo de agora, en Galicia hai un total de 5.393 persoas curadas, rexistrándose 547 falecementos.

Son datos actualizados este mércores pola Consellería de Sanidade de acordo co novo protocolo establecido polo Ministerio de Sanidade, polo que as altas epidemiolóxicas, inclúen o global de pacientes curados, xa que ata a data só se facilitaba a cifra de altas hospitalarias.
No conxunto de España, o número de casos positivos confirmados por PCR ascende xa a 212.917 tras 2144 tests positivos novos. O de falecidos chegou a 24.275 tras 325 novas mortes, un número superior ás 301 de onte, pero que aínda así mantén a tendencia descendente: o mércores pasado foron 435. O dato optimista do día é que se bateu un novo récord de curados, con 6.399 altas para facer un total de 108.947 desde o inicio da pandemia.

No día de hoxe e ata o momento non hai que contabilizar ningún falecido.