GALICIA: 1653 CASOS, 238 MÁIS QUE ONTE E 30 MORTES, 3 MÁIS

Galicia rexistra un total de 1.598 casos activos de infectados por coronavirus.
Un total de 25 persoas xa foron dadas de alta.

O Sergas ten a disposición da cidadanía unha páxina web coronavirus.sergas.gal, na que se pode consultar información dirixida á poboación, aos profesionais sanitarios e a outros colectivos.

A Dirección Xeral de Saúde Pública da Consellería de Sanidade informa que, na última actualización, o número de casos de coronavirus en Galicia ascende a 1.598, deles 389 son da área da Coruña, 99 da de Lugo, 186 da de Ourense, 202 da de Pontevedra, 396 da área de Vigo, 288 da de Santiago, e 38 da de Ferrol.

Do total de pacientes positivos, 69 permanecen en UCI, 409 están en unidades de hospitalización e 1.120 no domicilio. Polo de agora, en Galicia rexistráronse 25 altas de pacientes e 30 falecementos, os últimos correspondentes a dous homes de 83 e 74 anos que permanecían ingresados no CHUAC e no hospital Montecelo de Pontevedra.

En Galicia hai a día de hoxe 1.653 casos de coronavirus, tamén contando as mortes e as altas. Nas últimas 24 horas houbo 238 casos, unha cifra superior á do día anterior, cando se conseguiu reducir o número de contaxios tras cinco xornadas consecutivas de subidas.

O número de infectados en España este pasado martes segue aumentando ata os 47.610, rexistrando unha importante subida de casos en Cataluña, onde apareceron 2.073 novos positivos. Ademais o número de falecidos no noso país alcanza xa os 3.434. A nivel mundial a pandemia afecta xa a máis de 417.000 persoas nun total de 186 países e xa son 18.700 os falecidos, acumulando o maior número de defuncións Italia, onde segundo os últimos datos 6.820 persoas perderon a vida. O confinamento preventivo está a volverse a medida de contención por excelencia, afectando cada vez a máis país, aumentando así as imaxes de rúas baleiras e o cesamento de actividades en todo o mundo. Tras os datos do último balance España chega este mércores aos 3.434 falecidos vítimas do coronavirus tras rexistrar 738 novas mortes en 24 horas. O país convértese así no segundo do mundo con máis falecidos por detrás de Italia que rexistra xa 6.800. Ademais o número de infectados ascende actualmente a 47.610 en España.