NOVO RÉCORD DE VISITANTES NA RUTA RÍAS BAIXAS

A Ruta do Viño Rías Baixas alcanzou un novo récord en 2017. O itinerario, integrado no Club de Produto das Rutas do Viño de España, rexistrou un total de 115.459 visitantes, o que supón un incremento do 13,3% con respecto ao exercicio anterior. Así se desprende do ‘Informe sobre visitas a adegas e museos asociados das Rutas do Viño de España’ que presentou Acevin. “Estes bos resultados son froito do esforzo de todos os nosos asociados por ofrecer unhas experiencias enoturísticas da máxima calidade”, asegura o presidente da asociación, Juan Gil. Por primeira vez, o informe de Acevin desagrega o número de visitas por adegas e por museos adheridos ás distintas Rutas do Viño de España. No que respecta ao primeiro grupo, Rías Baixas sitúase como o sexto itinerario de España con maior número de enoturistas, alcanzando un total de 110.096 persoas. Sitúanse por diante dela Marco de Xerez, Penedés, Ribeira del Duero, Rioja Alta e Rioja Alavesa. No caso dos museos do viño, alcanzáronse os 5.363 visitantes, quedando, neste caso, no oitavo posto. En canto ao impacto económico, os datos sobre a Ruta do Viño Rías Baixas indican que o gasto medio por visitante a adegas é de 15,02 euros, o que supoñería un ingreso total de 1.653.641,92 euros. “A esta cifra cabería sumar o impacto económico noutros sectores turísticos da zona”, precisan desde a Ruta. O informe de Acevin tamén destaca que o 12,73% dos visitantes que escollen a Ruta do Viño Rías Baixas son estranxeiros. Isto tradúcese en que un total de 14.698 visitantes procederon de fóra do país, mentres que 100.674 foron españois. Por outra banda, o documento analiza a distribución temporal das visitas a adegas e museos do viño. No caso concreto da Ruta do Viño Rías Baixas, o mes de maior afluencia é agosto, mentres que xaneiro atoparíase no extremo contrario.