OS CONSELLOS REGULADORES PIDEN MENOS TRÁMITES

A conselleira do Medio Rural, Ángeles Vázquez, reuniuse este martes coas cinco denominacións de orixe de viño galegas, ás que comprometeu “manter unha comunicación fluída cun sector tan importante para a Comunidade como é o do viño”, indican desde a Xunta. Acompañada pola directora xeral de Gandaría, Agricultura e Industrias Agroalimentarias, Belén do Campo, Vázquez deu boa conta das demandas que lle trasladaron os portavoces de Rías Baixas, Ribeiro, Ribeira Sacra, Valdeorras e Monterrei, sobre todo a simplificación administrativa para todos os procesos que implican ao sector. Nese sentido, a conselleira comprometeuse a traballar por ese obxectivo e a facelo “de man dos consellos reguladores, para facilitar o seu traballo diario e favorecer a boa marcha deste ámbito”, precisa Medio Rural. Nese sentido, tamén se pretende a modificación de certos regulamentos ou normas que afectan os viticultores e adegas á hora de recibir axudas, como pode ser o sistema de autorizacións de plantacións de viñedo ou as axudas á promoción en terceiros países. Ángeles Vázquez destacou que desde o seu departamento loitarase por “defender os intereses do sector”. “Porque somos conscientes do labor que realizan os produtores e as industrias vitivinícolas, non só porque xeran postos de traballo e riqueza no rural, senón como vertebradores do territorio”, engadiu.