AS ACTIVIDADES DO DIA EUROPEO DO ENOTURISMO XA TEÑEN AS PLAZAS CUBERTAS

Todo preparado para a visita a dous establecementos asociados por parte da Fundación Down Compostela

A Ruta do Viño Rías Baixas chega á semana de celebración do Día Europeo do Enoturismo con todas as prazas completas nas súas actividades. Tanto a cata a bordo dun catamarán prevista para o 12 de novembro no Grove- como a V Cata Amateur o domingo 13 no Salón José Peña de Cambados- teñen todas as súas prazas cheas e mesmo rexistraron lista de espera.

Desde esta asociación sen ánimo de lucro móstranse moi satisfeitos por "a estupenda resposta que recibimos para as actividades do noso programa especial con motivo do Día Europeo do Enoturismo. Isto anímanos a seguir traballando nesta liña para ofrecer alternativas de lecer atractivas", afirma a xerente, Lorena Varela.

Ademais das dúas iniciativas abertas para o público en xeral, desenvolverase unha actividade accesible nunha adega asociada, localizada na subzona de Val do Salnés. Unha trintena de membros da Fundación Down Compostela participará nunha visita guiada ás instalacións (viñedo e adega), onde os asistentes poderán coñecer de primeira man o proceso de elaboración dos viños da Denominación de Orixe Rías Baixas. O percorrido finalizará cunha cata comentada de mostos e viños e un aperitivo.

Xa pola tarde, o grupo desprazarase a Cambados, onde realizarán un percorrido por esta vila, que culminará coa visita ao Palacio de Fefiñanes. "Unha completa xornada que esperamos axúdelles a coñecer mellor o noso patrimonio natural, histórico e vitivinícola", conclúe Varela.