"SOMOS CAMBADOS" AGRADECE A PRESENZA DAS CASE 200 PERSOAS Á SUA PRESENTACIÓN

SOMOS CAMBADOS  expresa mediante unha nota de prensa o seu agradecemento máis sincero a tod@s aquel@s que acudiron á presentación da sua candidatura, e as nosas desculpas ás ducias de persoas que tiveron que quedar fóra de Exposalnés. Unha vez máis SOMOS CAMBADOS veuse sorprendido pola impresionante resposta dos veciños e veciñas. As máis de 200 persoas que se achegaron ao acto demostran que, a pesar das limitacións económicas e materiais da candidatura, hai gañas de cambio en Cambados. SOMOS CAMBADOS non descansará ata o 24 de maio para conseguilo.

A afluencia de xente ao acto de presentación da candidatura desbordou por completo as expectativas dos máis optimistas. Pese a convocar o acto case exclusivamente polas redes sociais e apenas cunha ducia de carteis elaborados artesanalmente, máis de 200 veciños acudiron á chamada da candidatura encabezada por Tino Cordal.

Despois do visto na tarde de onte, a escaseza de recursos materiais e económicos de SOMOS CAMBADOS non parece que vaia ser un obstáculo para converterse na verdadeira alternativa a un PP desgastado e sen proxecto despois de 28 anos de maioría absoluta. SOMOS CAMBADOS demostrou contar cun equipo xoven, preparado, con ideas e que contaxia ilusión e credibilidade.

Abriron o acto as intervencións d@s candidat@s Esther Castro Trigo, Silvia Vozza, Xan Galbán e Xesús Castro, quen logrou emocionar aos asistentes coa lectura da carta de apoio a SOMOS CAMBADOS publicada a través dos blogs e das redes sociais por Óscar Pardo Planas, emigrante en Estados Unidos, que representa o sentir da maioría dos centos de mozos e mozas cambadeses que tiveron que emigrar nos últimos anos na procura dun futuro que en Cambados non puideron atopar.

O número dous da candidatura, o economista e empresario Xurxo Charlín, resumiu o “Programa de Goberno. 50 medidas para cambiar Cambados”, destacando aquelas propostas encamiñadas a axudar aos máis castigados pola crise, a crear emprego e a instaurar no Concello unha xestión baseada na honradez e a transparencia.

O acto rematou coa intervención do candidato á alcaldía, Tino Cordal, quen utilizou parte da súa intervención a criticar aos dirixentes do Partido Popular que fan da política unha profesión para enriquecerse: “Para os que pensan que Aragunde representa algo novo na política cambadesa, dicirlles que cando o noso candidato Marcos Daporta González estaba comezando preescolar, Aragunde xa estaba na política municipal vivindo dos impostos dos cidadáns. E para os que pensan que Aragunde representa algo distinto a Tourís, dicirlles que en 2014 dedicou 30.000 € a invitar aos seus colegas políticos do PP á comida do Albariño e só 7.000 € a becas para os estudantes de familias sen recursos… esas son as súas prioridades”.

Tino Cordal deixou ben claro que SOMOS CAMBADOS non se presenta a estas eleccións para conseguir un ou dous concelleiros, senón para liderar o cambio que Cambados necesita e ser a forza vertebradora dun goberno municipal que teña como obxectivos: axudar ás persoas que o precisan; apostar pola creación de emprego; e, xestionar con honradez, promovendo a participación e a igualdade de oportunidades”.

En tan só un par de semanas, SOMOS CAMBADOS conseguiu recuperar a ilusión dun número de veciños e veciñas que aumenta día a día e que agora si cren posible derrotar ao PP despois de 28 anos.