SAÍRON AS FOTOS DE FEIJÓO E DORADO DESDE O MESMO PP?

“Non quero facer oportunismo político con este tema agora. Pero sei que en Galicia hai un gran pacto de silencio para non falar diso pero se me pasara a min, non lles quero contar o que tería que explicar”. Foron as declaracións do ex secretario xeral do PSdeG, Pachi Vázquez, sobre as famosas fotos de Feijóo con Marcial Dorado.

 

En declaracións aos medios este xoves, Pachi Vázquez criticou que haxa un "acordo" para que o presidente da Xunta "fuxa sen explicar que facía celebrando aniversarios e fin de ano non un só ano, senón nove, co señor Marcial Dorado".

 

 Tras a publicacións de varias informacións, entre elas as do Galicia Confidencial de onde sacamos esta nova, sobre o coñecemento por parte de dirixentes do PP desas fotos un ano antes de facerse públicas, Pachi Vázquez dixo sentirse "moi gratificado" e suliñou que  "agora deixa claro que o PSdeG non tivo nada que ver con iso".

 

De feito, tras a publicación por parte de El País destas instantáneas, os populares acusaron directamente a Vázquez de estar detrás desta cuestión. Unhas semanas antes de aparecer neste xornal esas fotos, o ex líder do PSdeG dixo no parlamento que Feijóo e os narcotraficantes estaban “aí, aí”.

 

 “Cando se escriba a historia deste país, desde a distancia, non poderá haber un presidente que marche sen explicar que pintaba nove anos con ese home e aínda máis agora que empeza a haber datos dunha trama indirecta e que dentro do PPdeG había constancia de todo isto", manifestou.

 

A xuíza instrutora da 'Operación Pokémon' investiga a procedencia das fotos co contrabandista tras interrogar ao irmán da exportavoz do PP galego, Luciano Prado, un avogado que asegurara en escoitas telefónicas recollidas na investigación, que coñecía as imaxes un ano antes de ser publicadas.

 

 Vázquez lembrou na rolda de prensa que tivo que escoitar ao presidente Feijóo acusarlle de ser o "filtrador" das fotografías "e agora un destacado membro do PPdeG di que moito antes de que se publicasen, era coñecedor e sabía do tema das fotos". "Creo que empezamos a desenmarañar un tema", concluíu.

 NOVA RECOLLIDA DE GALICIA CONFIDENCIAL