OS BATEEIROS COA MOSCA TRALA OURELLA

Publicábamos hai uns dias que a  Consellería do Mar investirá un millón e medio de euros en axudas ós mexilloeiros afectados pola marea vermella. Para poder acollerse ás subvencións, os produtores deberán acreditar perdas superiores ó trinta e cinco por cento do volume anual de negocio ou un peche ininterrompido de, alomenos, catro meses.

Se ben valoran positivamente as axudas, os termos da convocatoria feitos públicos pola Consellería do Mar non son os agardados. O sector bateeiro consideran que a contía, un millón e medio, a distribuír entre as máis de tres mil bateas existentes en Galicia, apenas suporán un respiro. Máis aínda, cando os requisitos impostos pola administración farán que a maior parte dos produtores non poderán optar ás axudas. están dirixidas a aqueles que tiveron que parar durante máis de catro meses continuados ou que sufriron perdas superiores ó 35 por cento. Dende o sector apostan tamén por outras fórmulas para paliar os danos como unha liña de crédito oficial para retomar a actividade porque algúns produtores están tendo auténticas dificultades para saír adiante tralos nefastos resultados de 2014. 

Ás perdas económicas súmanse os desprendementos que arruinaron a futura colleita ou mesmo os danos nas bateas e outras infraestruturas necesarias para o traballo diario. Esta situación pon contra as cordas a moitos mexilloeiros que mesmo optaron por poñer á venda tanto as bateas como as embarcacións ante a imposibilidade de seguir facendo rendible a súa actividade.