LUAR NA LUBRE PRESENTA A SUA NOVA CANTANTE EN PONTEVEDRA

Luar na Lubre, un dos grupos de música galega máis internacionais, volve a Pontevedra. Pero esta vez faino con nova cantante, Paula Rey, recentemente incorporada á banda en substitución da anterior voz do grupo, a da portuguesa Sara Vidal, e sobre todo con novo traballo discográfico: Mar maior. Será nun concerto que se celebrará este sábado 2 de febreiro ás 21:00 horas no auditorio do Centro Sociocultural Novacaixagalicia.

En Mar maior a música medieval ten un importante protagonismo, maiormente a galaico-portuguesa, aínda que tamén hai unha forte presenza da música tradicional galega e atlántica, así como composicións propias que axudan a elaborar unha banda sonora inspirada no Leabhar Ghabhala Eireann, o libro das invasións de Irlanda escrito por monxes irlandeses do século XII.

Trátase dun libro de referencia na súa historia que coincide, ademais, no tempo coa época de máximo esplendor da propia lírica galaico-portuguesa. Unha vinculación atlántica apaixonante que fará un percorrido polos lazos de unión de Galicia con Irlanda e tamén con outras culturas da nosa contorna máis inmediata.

A formación musical conta con Paula Rey como voz, que se incorporou á banda despois de que Sara Vidal deixase o grupo; con Bieito Romeu na gaita e acordeón; con Patxi Bermúdez ao Bodhran, ao tambor e ao djimbek; con Xulio Varela nos coros e percusión tradicional galega; con Xan Cerqueiro á flauta e teclados; Eduardo Coma co violín; Pedro Valero con guitarra; e con Xavier Ferreiro como percusionista.

Luar na Lubre cumpriu 26 anos de traxectoria o pasado 2012 cun espléndido balance: 12 traballos editados, máis de 350.000 discos vendidos, máis de 1.000 concertos en 23 países de todo o mundo e nove premios musicais, o que o confirma, sen dúbida, como un dos grupos galegos con máis proxección dentro e fóra de Galicia.

As entradas para este concerto, que teñen un prezo de 18 euros, están á venda en www.servinova.com ou na billeteira telefónica 902 504 500.

Fonte: PontevedraViva