INVESTIGACION A CAMARA DE PONTEVEDRA

Fiscalía pide a Novagalicia os extractos da conta do enlace da Cámara con Brasil

A Fiscalía Provincial ven de solicitar a Novagalicia Banco os extractos da conta da empresa brasileira que serve como enlace da Cámara de Comercio de Pontevedra co país suramericano e cuxo titular podería ser veciño da cidade. A documentación solicitada polo fiscal delegado de Delitos Económicos enmárcase na investigación de posibles irregularidades na contratación de servizos relacionados coa promoción de eventos de comercio exterior en Brasil.

O proceso, que aínda está en fase de dilixencias, iniciouse tras a denuncia dun traballador da propia Cámara de Comercio. O autor da demanda vincularía a unha empregada cameral coa operación ao figurar a súa firma nunha das contas nas que se efectuaban os pagos ao provedor. Isto é, polo menos, o que aseguran fontes próximas á institución, que tamén apuntan que outras dúas empresas de Pontevedra poderían ser investigadas no marco deste caso.

A documentación que achegue a entidade financeira galega podería ser clave para pescudar se existe malversación de caudais públicos, un delito para o que o Código Penal prevé penas de entre tres e seis anos prisión segundo a gravidade dos feitos.