VOLVE A RUTA DO ALBARIÑO DE CICLISMO

Despois da paréntese do pasado ano debido á crise sanitaria da COVID, o Roteiro do Albariño regresa con forza ás estradas da comarca do Salnés. Os concellos de Meaño e Cambados serán o escenario esta fin de semana dunha cita consolidada no calendario ciclista e que na súa oitava edición reunirá ás principais promesas Júnior e Sub21 do noroeste da península ibérica. O pelotón do Memorial Modesto Sánchez Alba Teto estará formado por 22 equipos, dez deles chegados desde fóra de Galicia.

As dúas intensas xornadas que homenaxean a unha das figuras máis influentes na historia do ciclismo galego, foron presentadas este mércores no Concello de Meaño. Este acto contou coa presenza do alcalde anfitrión, Carlos Viéitez; da alcaldesa de Cambados, Fátima Abal; do deputado de Deportes da Deputación de Pontevedra, Gorka Gómez; do presidente da Federación Galega de Ciclismo ( FCG), Juan Carlos Muñiz; dun dos directores técnicos da FCG, Jose Manuel Abalo; do presidente do Club Ciclista Cambados, Ernesto Falcón; e de representantes da Garda Civil de Tráfico. Veloso e Almeida O ciclista Gustavo César Veloso, dúas veces gañador da Volta a Portugal, tamén quixo mostrar o seu apoio a este evento participando na súa presentación. O arousán do Atum Xeral- Tavira non foi o único corredor profesional que se dirixiu aos asistentes. O portugués Joao Almeida, unha das grandes figuras do panorama internacional e sexto clasificado na última edición do Xiro de Italia, enviou un vídeo lembrando con agarimo a súa participación na Ruta do Albariño do 2016. A edición deste ano repite o seu formato característico. A Ruta comezará o sábado pola mañá (11:00 horas) cun sector individual, unha cronoescalada de 3 quilómetros entre Meaño e o Alto do Busto. Esta primeira xornada completarase pola tarde (17:00 horas) cunha carreira en liña de 63 km, con inicio e final na Rúa Desiderio Abalo de Meaño. Ao día seguinte, a Avenida de Galicia de Cambados, será punto de saída e chegada da última etapa, unha tirada de 92 km. Como antesala ao comezo da competición, e para cumprir co protocolo sanitario, o venres pola tarde efectuaranse probas de detección da COVID no pavillón de Dena. Os 22 conxuntos participantes reunirán un pelotón que roldará os 150 ciclistas. A nómina de equipos galegos alcanza a ducia de escuadras: Avanza-O Porriño, Alca- Retelec, Barbanza, Cambre, Cidade de Lugo, Farto, Lasal Cociñas- Louriña, Aluminios Cortizo, Ponteareas, Vigo-Rías Baixas, Supermercados Froiz e Vigués. Por parte do ciclismo portugués, gran dominador da Ruta nos últimos anos, estarán catro formacións: Seissa, Efapel, Bairrada e Bruno Neves. O resto de estruturas proceden de Asturias ( MMR), Castela e León ( Emico e Reino de León), Cantabria (Corbatas Pindal y Bathco) e da Comunidad de Madrid (Entrenamiento Ciclismo).