UN INCENDIO DEIXA 17.000 MIL AVES MORTAS EN MEIS

Arquivo

Un incendio nunha nave de explotación de polos deixa 17.000 mil aves mortas en Meis

Un incendio declarado esta madrugada nunha nave dedicada á explotación de polos, localizada no concello pontevedrés de Meis, calcinou por completo a primeira planta do inmoble e o tellado provocando a morte de todos os polos que estaban no seu interior.

O incidente tivo lugar ás 4:30 horas no lugar Cabeza de Boi. A esa hora, o 112 Galicia recibía a chamada dos axentes da Garda Civil que alertaban dun lume nunha granxa de explotación de polos na parroquia da Armenteira.

Decontado, desde o Centro Integrado de Atención ás Emerxencias (CIAE) pasouse aviso aos Bombeiros do Salnés,  aos voluntarios de Protección Civil da localidade e ao persoal do Servizo de Urxencias Sanitarias de Galicia-061, por se fose precisa a súa intervención nalgún momento. 

Nada máis chegar ao lugar dos feitos, os membros do Servizo de Prevención Extinción de Incendios e Salvamento trataron de atallar as lapas e controlaron o foco de incendio. Malia que ningunha persoa sufriu danos a raíz do ocorrido, os 17.000 polos que habitaban a granxa perderon a vida.

Tras rematar a intervención, os bombeiros confirmaron que o lume calcinou por completo o primeiro andar, dos dous dos que se compón a nave, e afectou tamén ao tellado da edificación.