ALUMNOS DA UNIVERSIDADE DA CORUÑA VISITAN CAMBADOS PARA COÑECER A RUTA DO VIÑO

A Ruta do Viño Rías Baixas, incluída no Club de Produto das Rutas do Viño de España, recibiu este venres a visita dunha vintena de estudantes da Escola de Turismo da Universidade dá Coruña, unha iniciativa que se desenvolve por cuarto ano consecutivo e que permite aos participantes coñecer de primeira man este proxecto enoturístico. O grupo estivo conformado por 13 alumnos e alumnas de 4º curso e 8 do Máster Oficial en Planificación e Xestión de Destinos, que estiveron acompañados por Carlos Rodríguez, secretario da Escola de Turismo da Coruña, e polo profesor de este mesmo centro Carlos Alberto Rivas. A xornada incluíu unha visita cultural ofrecida por Turismo de Cambados, na que unha técnica deste departamento explicoulles as orixes da vila, así como detalles sobre a emblemática Praza de Fefiñáns e outros lugares de interese turístico da localidade. Unha vez neste punto, comezou o percorrido guiado pola adega e destilería Gil Armada, á que seguiu a visita a outras adegas. Deste xeito, o alumnado puido descubrir as singularidades de cada unha destas empresas asociadas á Ruta do Viño Rías Baixas, ademais de ter a oportunidade de degustar as súas elaboracións. A xornada tamén incluíu unha charla técnica sobre a Ruta, impartida pola xerente, Lorena Varela, e pola técnica Laura Expósito, que explicaron ao grupo os principais obxectivos do seu proxecto, baseado en ofrecer experiencias enogastronómicas diferenciadas e da máxima calidade; e unha visita a Pazo Baión.