NOVEDADES DA "RUTA DO VIÑO RIAS BAIXAS"

Sesións de maxia, bicicleta en familia e actividades accesibles son as principais novidades da programación anual da Ruta do Viño Rías Baixas, itinerario enoturístico incluído no Club de Produto das Rutas do Viño de España. O presidente da asociación sen ánimo de lucro, Juan Gil, e a xerente, Lorena Varela, presentaron esta mañá en rolda de prensa as iniciativas que se desenvolverán durante 2017.
Na súa intervención, Gil de Araujo destacou que "foron máis de 1.500 persoas as que participaron nas actividades organizadas pola Ruta do Viño Rías Baixas durante 2016. Estes bos resultados anímannos a seguir innovando con propostas diferentes que poñan en valor a enogastronomía do noso territorio", concluíu. Así mesmo, o presidente adiantou un primeiro balance das cifras de visitantes do pasado ano ás adegas e establecementos asociados que, afirmou, "vai resultar moi positivo", ratificando, deste xeito, "o progresivo interese que suscita a Ruta do Viño Rías Baixas entre foráneos e visitantes".
Pola súa banda, Lorena Varela desgranou o programa de actividades previsto para este 2017. "Unha das principais novidades deste ano será a Ruta de Ilusión. Trátase dun programa, incluído dentro das Xornadas de Puertas Abertas das Rutas do Viño de Galicia, no cal ofreceremos dúas actuacións de Pedro Volta en adegas asociadas", indicou a xerente. Esta programación especial tamén incluirá unha nova sesión da Ruta con Humor, que correrá a cargo de Quico Cadaval.
Outra das grandes novidades deste ano será a Ruta de Estrelas, que se desenvolverá durante o verán. Esta iniciativa comprenderá "unha visita nocturna a unha adega asociada cunha posterior observación de estrelas", indicou Lorena Varela.
Na liña de seguir vinculando enoturismo e deporte, ofrecerase a proposta Bici en familia, que se desenvolverá no municipio das Neves. A esta iniciativa unirase unha nova edición da BTT Ruta do Viño Rías Baixas, que, nesta ocasión, celebrarase na subzona de Condado do Tea. Ademais, ofreceranse outros dous novos percorridos dirixidos aos amantes do sendeirismo.
Dentro das actividades de accesibilidade, organizouse, de modo conxunto coa Asociación de Persoas Xordas de Santiago de Compostela, unha visita e cata de viños signada co fin de achegar a este colectivo ao enoturismo. "Ademais, estamos a preparar tamén outra iniciativa dirixida a persoas con parálise cerebral", adiantou Lorena Varela.
Tamén como novidades deste 2017 destacan diversas visitas á Ruta do Viño Rías Baixas. Entre elas, atópase o Fam Tryp da Ruta do Viño de Montilla-Moriles, ademais do percorrido que os alumnos do Máster de Turismo realizarán o próximo 9 de marzo. Desde a Ruta do Viño Rías Baixas realizarán, así mesmo, unha viaxe de familiarización a unha das Rutas do Viño de España co fin de intercambiar experiencias e ampliar os seus coñecementos.
Catas e visitas
Por outra banda, manteranse para este ano programas específicos xa consolidados como as Catas entre Amigos, que comezaron o pasado venres cunha degustación de tintos Rías Baixas en Santiago de Compostela. As sesións desenvolveranse nas cidades de Vigo, Pontevedra e O Grove.
Así mesmo, a Ruta do Viño Rías Baixas colabora co Consello Regulador da Denominación de Orixe Rías Baixas na Cata polo Día Internacional da Muller. Esta desenvolverase o día 10 de marzo ás 20.00 horas no Pazo de Mugartegui. "Esta actividade, dirixida exclusivamente a mulleres, xa ten todas as súas prazas completas", concretou a xerente.
Non faltará no programa anual a VI Cata Amateur Ruta do Viño Rías Baixas, acto central dentro das actividades polo Día Europeo do Enoturismo. A esta iniciativa tamén se sumará a celebración dunha nova cata de viños pola Ría de Arousa a bordo dun catamarán.