A RUTA DO VIÑO RIAS BAIXAS MELLOR VALORADA EN XESTIÓN E PLANIFICACIÓN

Rías Baixas sitúase á cabeza das 27 Rutas do Viño de España en canto a xestión e planificación. Así o corrobora o informe final do Proceso de Auditoría 2015-2016 presentado tras a última reunión de ACEVIN, celebrada esta semana en Madrid.

O estudo presentado pola Asociación de Cidades do Viño de España establece para a Ruta do Viño Rías Baixas unha puntuación de 88 sobre 100 en canto a planificación e xestión, por diante doutros itinerarios como Somontano ou Ribeira Guadiana, que alcanzaron neste aspecto un 81 e un 76, respectivamente. Entre os aspectos que se valoran desde a consultora que realizou a auditoría atópanse un equipo de xerencia amplo e estable, cunha asistencia externa e que consegue resultados óptimos aínda non contando cunha capacidade orzamentaria tan ampla como outros itinerarios enoturísticos.

As auditorías realizadas entre 2015 e 2016 ás agora 27 Rutas do Viño de España tamén tiveron en conta outras cuestións como a calidade do destino, os labores de promoción e comercialización, o sector da enoloxía e os aspectos turísticos. En todos eles, Rías Baixas sitúase, ben na media das 27 Rutas do Viño de España, ou por encima dela. Estes resultados avalan, por tanto, o labor desenvolvido non só desde o ente xestor desta asociación sen ánimo de lucro, senón tamén o traballo desenvolvido polos seus máis dun centenar de socios.

En termos xerais, a Ruta do Viño Rías Baixas é o cuarto itinerario enológico con mellores resultados no proceso de auditoría, obtendo unha puntuación de 80,6 sobre 100, por diante doutras Rutas como Ribera de Duero, Campo Borja ou Rioja Alavesa. Por diante de Rías Baixas só atópanse Ribeira Guadiana, Somontano e Navarra, cunhas puntuacións de 85, 81,8 e 80,8, respectivamente. A media total de puntuacións de 27 Rutas do Viño de España sitúase en 73,8, unha cifra que a Ruta do Viño Rías Baixas supera en case sete puntos.

A xerente da Ruta do Viño Rías Baixas, Lorena Varela, mostrouse moi satisfeita cos excelentes resultados obtidos no informe das auditorías realizadas por ACEVIN. "Este estudo ratifica que o noso cumprimento de todas as esixencias de organización, calidade e atención valorados desde o Club de Produto de Rutas do Viño de España atópase ao máis alto nivel. Pero todo isto non sería posible sen o apoio dos nosos asociados, que traballan día a día por facer da Ruta do Viño Rías Baixas un destino enoturístico de referencia non só a nivel galego, senón tamén a nivel nacional", conclúe.

ACEVIN realizará este ano unha nova auditoría á Ruta do Viño Rías Baixas. Este proceso é un dos requisitos que deben pasar todas as Rutas do Viño de España para poder pertencer a este prestixioso Club de Produto.