"EINSTEN-ROSEN" DE OLGA OSORIO ACADA OUTRO PREMIO

‘Cuerdas’ de Pedro Solís e a galega ‘Einstein-Rosen’, de Olga Osorio foron as curtametraxes favoritas do público que participou esta fin de semana na Cidade da Cultura na primeira edición do ‘PequeFilmes’, Festival de Cine Infantil de Galicia.

O festival promovido pola Consellería de Cultura, Educación e Ordenación Universitaria contou coa proxección dun total de 52 filmes –divididos en dúas franxas de idade: de 5 a 8 e de 9 a 13 anos- e unha serie de obradoiros formativos cos que os cativos descubriron de primeira man o funcionamento do cine de animación. Preto de 1.500 persoas se achegaron durante a fin de semana á Cidade da Cultura para participar nesta primeira edición do ‘PequeFilmes’. Tras o visionado das curtas, o público valorou cada un dos filmes co obxectivo de facilitarlle aos pequenos unha primeira experiencia como espectador de cine crítico e curioso, que xere afección de cara ao futuro.

Tras o reconto das valoracións, na franxa de 5 a 8 anos, o público elixiu como a súa curta favorita ‘Cuerdas’, de Pedro Solís, gañadora da mellor Curta de Animación nos Goya 2014. Unha historia de amizade contada cunha tenrura exquisita na que María coñece ao seu novo compañeiro de clase, Nico, un neno con parálise cerebral, e ao que introduce nos seus xogos a través da imaxinación e o enxeño. Pola súa banda, na franxa de 9 a 13 anos, a curta mellor valorada polo público foi ‘Einstein-Rosen’ de Olga Osorio, rodada no Barrio das Flores da Coruña. A curta galega está ambientada no verán de 1982.

Procedentes de todas as partes do mundo, o cartel deste mini-festival contou con curtas recoñecidas nos máis prestixiosos festivais como a noruega ‘Me and my Moulton’, nominada aos Oscar 2015; ‘Juan y la Nube’, Goya á Mellor Curta Animada; ‘The empty’, Gran Premio en Hiroshima e Seúl; ‘Trial & Error’, Platinum Remi Award no World Fest de Houston; ou‘Pawo’, Mellor Película Infantil en Brasilia Animation Festival 2015. Ademais, o festival contará con varias curtas realizadas e producidas en Galicia.

Olga Osorio, a sua parella Juan Galiñanes e os dous fillos da parella participan na curtametraxe.

Rodado na Coruña cun equipo 100% galego, "Einstein-Rosen" ambiéntase no verán do 82. Teo asegura que atopou un buraco de verme ante a incredulidade do seu irmán Óscar. Os protagonistas comparten nome cos actores que lles dan vida, os irmáns Galiñanes, fillos dos produtores da curtametraxe -Juan Galiñanes e Olga Osorio, baixo o selo Miss Movies- e fonte de inspiración directa do que nel nárrase. Comparten cartel cos coñecidos Ricardo de Barreiro e Xúlio Abonjo.

A obra combina a ciencia-ficción, o espírito lúdico da infancia e a capacidade de facer convivir o real e o asombroso sen solución de continuidade, capacidade que cun pouco de sorte non perdemos do todo de adultos. O título fai referencia a outro dos moitos nomes dos buracos de verme, á vez que permite establecer un paralelismo entre os dous científicos e os pequenos protagonistas.