O XUVEN VOLVE A GAÑAR

Imaxe: Luis Gomez

A xeira de tres derrotas seguidas dos galegos chegou ao seu fin en Ou Pombal con moito sufrimento, ante un conxunto levantino que segue sen estrearse a domicilio, pero que vendeu carísima a súa derrota.

Igualdade ata o ecuador do acto inicial (7-5), que daba paso a un 7-0 local (14-5). Os de Manu Santos estaban cómodos sobre a pista, pero todo cambiaba no comezo do segundo período, cun parcial 2-12 que daba o mando do encontro aos de Víctor Rubio (18-19). De novo volvía a igualdade ata os instantes previos ao descanso, cando os levantinos, cun traballo moi coral, lograban irse con 5 puntos de renda aos vestiarios (34-39).

Con Tomasevic inspirado polo bando valenciano, Hispagan UPB Gandía conseguía escaparse ata os 9 de vantaxe (40-49). A sombra da cuarta derrota seguida sobrevoaba a cancha pontevedresa, pero Shota Gelazonia disipábaa comandando un parcial 9-0 para empatar o partido. Os levantinos non acusaban o golpe e seguían por diante, chegando a contar con 5 tantos no comezo do período decisivo (55-60). Xuven Cambados tiraba de defensa, secaba ao seu rival durante máis de tres minutos e collía o liderado (67-65). Duch arrefriaba a reacción galega cun triplo (67-68) xusto antes do momento Osborne: cinco puntos, con triplo incluído, para acabar coa resistencia valenciana.

A clave: A mellor versión de Charles Nkaloulou desta tempada: 16 puntos, 12 rebotes e 27 de valoración. Xunto ao interior, outros catro xogadores galegos fóronse por encima da decena de anotación.


Estatística