ADXUDICADAS OBRAS NA PROVINCIA POR VALOR DE 6 MILLÓNS DE EUROS.

A Deputación de Pontevedra adxudicou e licitou, na súa Xunta de Goberno do venres pasado, obras por un importe de 6 millóns de euros.

En total adxudicáronse 12 obras e subministracións nos concellos de Cangas (2), Soutomaior, Pazos de Borbén, Ponte Caldelas (2), O Porriño, Silleda (3), Caldas de Reis e Lalín, por un importe total próximo ó millón de euros.

Así mesmo, aprobouse o expediente de contratación para a licitación doutras 13 actuacións en diferentes concellos da provincia, por un importe superior ós 4 millóns de euros, que se executarán nos concellos de Barro (2), Cambados, Cangas (2), Lalín, Mondariz, Poio, Valga, Vilagarcía de Arousa, O Rosal, Ponteareas e Redondela.

A Xunta de Goberno abordou distintas actuacións nas comarcas de Arousa e 
Caldas, entre as que figura a adxudicación, a Idelnor Proyectos, Gestión y 
Servicios S. L., dos traballos de renovación da iluminación pública en varios 
núcleos da parroquia de San Clemente, en Caldas de Reis, por un importe de 

32.670 euros. 
Aprobáronse varios expedientes de contratación, entre os que figura 
o correspondente ás obras de mellora do pavillón de Castelao, en Vilagarcía de Arousa. 
Estas obras saen a licitación por un importe de 144.089,73 euros e consistirán na reparación da estrutura do edificio; a apertura dunha porta de evacuación a través da galería comercial situada ó seu carón; o pintado interior do edificio; a reparación das filtracións na cuberta e a instalación de novo pavimento deportivo, ademais da limpeza da fachada. 
A estes traballos súmase a licitación da segunda fase de mellora dos servizos 
urbanos da praza de Abraldes e das rúas Triana e Bimbio, no concello de 
Cambados. 

As obras contan cun orzamento de 66.910,25 euros e o seu obxectivo é 
completar a urbanización e o embelecemento de todo o contorno da praza de 
Fefiñáns, no que se sitúan estas rúas e prazas. 
As obras incluirán a canalización, de forma separada, das redes de 
saneamento de fecais e pluviais, a renovación da rede de abastecemento e a substitución do actual pavimento de formigón (que se atopa moi deteriorado) por outro de lousa de pedra nas beirarrúas e de taco de granito na calzada.