LORES SEGUE A DEFENDER A PAGA POR PRODUCTIVIDADE

LORES SEGUE A DEFENDER A OS TRABALLADORES MUNICIPAIS EN CONTRA A IDEA DO PARTIDO POPULAR.

O alcalde de Pontevedra, Miguel Anxo Fernández Lores, mostrouse "moi tranquilo" con respecto ás consecuencias que se poidan derivar da decisión do Goberno local de abonar un complemento de produtividade aos funcionarios fronte á perda da paga extra de Nadal ordenado polo Executivo central. "Xa sabiamos que podería haber un recurso; é consecuente coas políticas do PP de defender os intereses da banca e ir contra os traballadores", apuntou.
Lores defende que a súa proposta para compensar a paga extra conta co aval xurídico dos servizos municipais


En declaracións aos medios, Fernández Lores apuntou que decidiu facer esta política de insumisión e que, ademais, "consultouse a todos os sectores e todos estaban de acordo, empresariais, comerciais e sindicais".

O alcalde pontevedrés indicou que a decisión foi adoptada baixo o punto de vista xurídico e administrativo dos servizos municipais e sinalou que "tamén hai recursos polos que se pide que se pague a paga extraordinaria". "Igual a decisión do Goberno non é legal", suxeriu.

Ademais, dous novos concellos, ambos con alcaldes do BNG, uníronse a Pontevedra e decidiron compensar economicamente aos seus funcionarios pola perda da paga extra de decembro. Trátase de Bueu, onde gobernan os nacionalistas con maioría absoluta, e Poio, onde o fan en coalición co PSDEG.

Os traballadores municipais do Concello de Poio recibirán esta paga extra coa nómina de xaneiro. Compensaráselles cunha cantidade que supón, aproximadamente, un 80 por cento do que sería unha paga extra completa. O Goberno municipal articulará esta decisión mediante un complemento de produtividade que recibirán os funcionarios en función das horas extras traballadas.

Con todo, ao contrario do caso de Pontevedra, non será necesario aprobar unha modificación de crédito. Segundo explica o alcalde, Luciano Sobral, esta medida non supón incumprir a normativa do Goberno, xa que o municipio dispón dunha partida "que non se tocou" duns 140.000 euros, cantidade que se aforrou" o goberno ao non abonar a paga extra. Será con ese remanente co que se abonen as horas extra dos funcionarios.

BUEU

Pola súa banda, o complemento de produtividade tamén é a fórmula elixida polo Concello de Bueu, pero repartíndoo en tres mensualidades. Segundo o concelleiro de Facenda, José García Cuervo, o 50 por cento dese complemento pagouse coas nóminas de novembro, outro 40 por cento abonarase este mes e o 10 por cento restante, ingresaráselles en xaneiro.

O Goberno de Bueu admite que este pago "non é normal", pero rexeita denominalo como paga extra. "Nós pagamos unha porcentaxe dunha produtividade", explicou o edil nacionalista, quen recordou ademais que esta medida de compensación salarial xa se utilizou no municipio en anos anteriores.