NON HAI DIÑEIRO PARA MÉDICOS PERO A XUNTA GÁSTASE MÁIS DE 330.000€ AO ANO EN PUBLICIDADE SANITARIA

A Xunta destina polo menos cada ano 330.000€ a dúas campañas de publicidade en medios de comunicación relacionadas co SERGAS, a pesar das continuas protestas pola falta de investimento en recursos humanos
O pasado luns sucedeu algo nunca visto na historia da sanidade pública galega. Case todos os xefes de servizo e os responsables de centro de saúde dunha área sanitaria dimitían en bloque. A renuncia destes cargos da comarca de Vigo non é a única protesta que acosa ao conselleiro de Sanidade, Jesús Vázquez Almuiña. Por poñer outros dous exemplos, aínda que hai moitos máis: o servizo de urxencias do hospital de Santiago leva de folga varias semanas e hai meses que a comarca do Morrazo mobilízase pola falta de pediatras. E agora toca a Cambados. Todas estas protestas teñen a mesma raíz. A falta de suficiente investimento en recursos humanos para manter á boia a precarizada persoal SERGAS. Como denunciaba un dos portavoces dos dimisionarios, os médicos galegos ou son moi maiores, ou son mozos precarios ou, simplemente, emigran en canto poden. O médico Luís Garnelo indicou que os residentes de Medicina de Familia "escapan" ao terminar a súa formación ou ben "ao estranxeiro, á sanidade privada ou a outras zonas de España onde lles tratan mellor". Esta falta de investimento non se dá en aspectos máis secundarios, en concreto en gasto en publicidade en medios de comunicación. Revisando a Plataforma de Contratos Públicos de Galicia pódese comprobar que o Goberno Galego segue dedicando, ano tras ano, unha parte significativa dos seus recursos en propaganda sanitaria. CAMPAÑAS IDÉNTICAS TODOS Os ANOS Recentemente, a secretaría xeral de Medios gastou 94.769,62€ en adxudicar a JJ Publicidade e Comunicación a creatividade dunha campaña para "promoción e prevención da saúde" en setembro. Uns meses antes, en xullo, a Consellería de Sanidade dedicou 181.500,00 € ao "servizo de inserción de publicidade para a difusión de información e promoción da doazón de sangue da Axencia Galega de Sangue, Órganos e Tecidos". A axencia gañadora neste caso foi Canle de Comunicación. Estas dúas campañas de 2018 son reflexo case idéntico doutras dúas campañas de 2017. En xuño do ano pasado o SERGAS adxudicaba a Canle Uno 150.000 euros para unha campaña da Axencia Galega de Sangue, Órganos e Tecidos. En agosto dese ano JJ Publicidade e Comunicación levaba 149.944,63 € pola campaña "a sanidade como servizo público de referencia". ATA 363.000 EUROS AO ANO EN PUBLICIDADE DIRECTA DO SERGAS, PERO O GASTO FINAL É MAIOR Así que o gasto anual directo da Xunta en campañas de publicidade relacionadas coa sanidade oscila entre os 275.000 e os 300.000 euros ao ano. Se lle engadimos o IVE, que non figura desagregado nas adxudicacións da Plataforma, o custo anual dispárase a unha orquilla de entre 332.000 euros e 363.000 euros ao ano. Isto tendo en conta só o montante directo en campañas de Sanidade. A maioría das adxudicacións de propaganda da Xunta dos últimos anos fanse a través de acordo marcos, polo que goberno contrata anuncios relacionados coa sanidade, pero tamén con outros ámbitos medio rural, innovación, etc. Por exemplo, o acordo marco para servizos de elaboración de campañas de comunicación adxudicado no principio do ano incluía polo menos unha campaña relacionada coa saúde. O importe global da súa presuposto base de adxudicación rozaba os 800.000 euros. Aos que hai que sumar outros 252.000 euros que se gastou na contratación de valos publicitarios e outros soportes exteriores esta primavera.