DOUS FERIDOS EN SENLLOS ACCIDENTES NA COMARCA ESTA TARDE

Un garda civil, ferido nunha colisión na Illa de Arousa

Un axente da Garda Civil resultou ferido esta tarde nun choque entre a moto na que circulaba e un turismo. A vítima, que no momento do sinistro estaba fóra de servizo, foi evacuada polos efectivos sanitarios a un centro hospitalario.

O accidente produciuse na PO-299,  na rotonda de acceso á Illa.

Unha persoa particular alertou da situación ao 112 Galicia ás 16:30 horas desta tarde. Acto seguido, dende o Centro de Atención ás Emerxencias do 112 Galicia informouse a Urxencias Médicas, aos Bombeiros do Salnés e á Garda Civil de Tráfico.

Accidente en Meis
Ademais, en Meis, unha muller resultou ferida despois de que o coche sen carné co que circulaba batese contra un poste.

O sinistro tivo lugar na estrada que conecta Pontenova con Cambados, preto do Mosteiro. Foi unha persoa particular a que chamou ao 112 Galicia ás 16:50 horas desta tarde para explicar o ocorrido. Dende a central de emerxencias alertouse a Urxencias Médicas, aos Bombeiros do Salnés, a Protección Civil e á Garda Civil de Tráfico.