ESTA MADRUGADA ENTRA OUTRO TEMPORAL

A Dirección Xeral de Emerxencias e Interior da Vicepresidencia da Xunta alerta de que o temporal costeiro de nivel vermello estenderase mañá, 3 de febreiro, ao litoral da provincia de Lugo a partir das primeiras horas do día, e continuará na costa da provincia da Coruña e Pontevedra ata media mañá.

A partir das 00.00 do 3 de febreiro quedará tamén activa a alerta laranxa por vento na provincia de Ourense, con refachos que poderán acadar os 110 quilómetros por hora.

Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos concellos afectados; ás Deputacións, servizos provinciais e agrupacións de voluntarios de Protección Civil e aos clubs náuticos, entre outros. Deste xeito, agárdase que se adopten as medidas oportunas para garantir a seguridade dos bens e das persoas.

Recórdaselle á poboación a importancia de seguir as medidas de protección como evitar aproximarse a diques ou rompentes co fin de previr un eventual golpe de mar que poida arrastrar persoas ou obxectos ou vixiar posibles caídas de obxectos desde balcóns e fiestras. Ademais, aconséllase consultar a páxina web do CAE 112 (www.112galicia.org), que conta con información meteorolóxica e con enlaces de interese.

Tamén de cara a mañá, 3 de febreiro, a Comisión Escolar de Alertas da Consellería de Cultura, Educación e Ordenación Universitaria acordou a suspensión das actividades no exterior dos centros educativos de todos os concellos de Galicia desde as 15.00 horas. Esta medida non afecta á actividade docente nin ao transporte escolar. No caso de que as circunstancias meteorolóxicas na localidade onde se atopa o centro de ensino supuxesen un risco superior ao declarado, os directores poderán adoptar as decisións oportunas respecto das actividades no exterior ou as extraescolares.

356 incidencias ata as 18,00 horas

O Centro de Atención ás Emerxencias (CAE) 112 Galicia xestionou entre as 00,00 horas e as 18 horas de hoxe un total de 356 incidencias relacionadas co temporal que está a afectar á nosa comunidade.

Segundo o informe actualizado ás 18.00 h, as incidencias máis destacadas dende o comezo do temporal son caída de árbores e pólas, carteis, pancartas, cables de luz, terra e pedras en estradas, ademais de anegamentos en garaxes, rúas e vivendas.

Os concellos con máis número de incidencias foron na provincia da Coruña, Ribeira, Santiago de Compostela, Boiro e Ferrol; na provincia de Pontevedra, Vigo, A Estrada, Pontevedra, Cangas e Lalín; na provincia de Lugo, Vilalba e Friol; e na provincia de Ourense, os concellos de Toén e Ribadavia.